طارطة باردة من ابداعي

pharmajsk · 2013-08-20, 14:23

السلام عليكم
واش راكم ان شاء الله كامل لاباس اليوم جيت وجبتلكم معايا طارطة باردة تقدم مع عصير والله ذوقها رائع وعجبتهم كامل وبدون مراح نطول عليكم نخليكم مع المقادير واعتذر مصورتش المراحل على خاطر كنت مزروبة لكن هي سهلة وبنينة

المقادير
120غ زبدة
2صفار بيض
كاس سكر قلاص
فاني
وفرينة

الحشو

علبة كرام باتيسيار انا استعملت نكهة الموز

التزين
شكولا سوداء وبيضاء
و100 غ غبرة شانتي

طريقة التحضير

في اناء حطي الزبدة بحرارة الغرفة اخدميها ثم ضيفي صفار البيض وخدمي مليح حتى يدخل فيه ثم السكر ثم الفاني وفي الاخير الفرينة حتى تتحصلي على عجينة طرية
في مول الكيش ولا حبيتي طارطولات صغار حطي العجينة وسويها مليح وثبيها بالشوكة والى الفرن
كي طيب نحيه وخليه يبرد

من جهة اخرة حضري كرام باتيسيار
نصف لتر حليب بارد فيه 4 ملاعق سكر عادي وضيفي كيس غبرة كرام باتيسيار وخلطي وهواما باردين وممبعد حطي فوق النار دون التوقف عن الخلط حتى تعقد
فرغيها فوق المول لي صنعتيه
طلعي كرام شانتي 100 غ في كاس حليب بارد جدا حى تطلع ديكوري بيها وزيدي شكولا واذا حبيتي حطي فواكه يعني طريقة التزين تبقى على حسب الذوق ديالك
وهذا الشكل الاخير ديالها

متنساونيش بدعائكم