مجرد فضفضة-اتمنى التفاعل-

[الشاوية98]

السلام عليكم ورحمة الله تعالى و بركاته

واش راكم ان شاء الله تكونوا كامل بخير

هادي اول مشاركة لي في هاد القسم و حبيت نحكيلكم حكايتي و نفرغلكم قلبي لأنو قريت الكثير من قصص الناس و احوالهم مالا تشجعت انا تاني نحكي حكايتي

نبداو بعد بسم الله هههه انا بنت ننتمي لعائلة محترمة و والديا ناس معروفين و عندهم قيمتهم في مجتمعنا تربيت على الاخلاق و الدين كبرت و بعد ما وليت مراهقة كأي حالة من المراهقين تعرفت على العالم الفيس بوك و اصبحت احد المدمنين عليه في البداية كنت غير نستعملو من اجل انو نحكي مع افراد عايلتي ولا زملائي
مع الوقت تعرفت على صديقات في الثانوية و اللي ان شاء الله ربي يهديهم كانوا اصدقاء سوء شجعوني على التعرف على شباب و اولاد و تكوين علاقات معاهم في البداية انا عارضت و قلت هاد الشي منافي للدين نتاعنا و حرام و لكن كان في اعتقادي انهم راح يفهموا وجهة نظري لكن بالعكس و كيما راهو صاري في الايام هادو نعتوني ب(المعقدة) كيما يقولو لأني ما نحكيش مع الشباب و انا من خوفي اني نخسرهم و بالإضافة الى ذلك كانت شخصيتي ضعيفة و قدروا يستدرجوني معاهم في طريق الضلالة المهم انا درت كيما قالولي و بديت نتعرف على ولاد و من مختلف الولايات
في يوم من الايام تعرفت على شاب و يوم بعد يوم تطورت العلاقة بيناتنا و وليت نحكي معاه في التلفون و منا و كيما تعرفو يوعدني و يحكي معايا و كل هادوك الأكاذيب انا ربي يغفرلي صدقتو و سمعت لكلامو الى ان جا يوم عرفو والديا فيه بعلاقتي بيه هوما بالطبع زعفوا مني و حبوا يبينولي حقيقة هادا الشاب و بلي مكانش واحد يحبني و يحبلي الخير كيما ماما و بابا بعد الشي هادا عرفت بلي هادا الشاب كبير عليا بزاااااااااف و مخصص حياتو غير لهاد صوالح و تمسخير بالبنات
ان شاء الله ما تفهمونيش غالط و تاخذوا الامر على محمل الجد لأني تغيرت و تبت الى الله تعالى و بعدت على صحاب السوء كامل و بديت حياة جديدة

ايه و بغيت نقول يا البنات وحدا ما دير لمان في واحد اول حاجة هادا شي حرام و يغضب ربي و الوالدين
ثاني حاجة و الله غير تخسري حياتك و صحتك و وقتك و مالك و كل ماهو عزيز عليك
يعني توبي لربي قبل فوات الاوان و احكمي الطريق الصواب

و حاجة تاني انا كنت مدمنة على سماع الاغاني و كيما نعرفو هادا شي حرام وبغيت نبعد على الموسيقة و الاغاني
ونويت نحفظ كلام ربي خير و نختم بإذن الله
مالا لي باغي يعاوني يعطيني اي نصيحة باش نبعد على الاغاني و نحكم طريق ربي

و ان شاء الله توقفوا معايا و تكونوا من الناصحين ليا لأنو شفت كل اعضاء هاد المنتدى كيما الخاوة يعاونو بعضاهم و تمنيت ننضم لهاد الاسرة نتمنى تقبلوني كفرد منكم
بعد ما فتحتلكم قلبي و ارتحتلكم

في امان الله
مع السلامة