تعلمي الخياطه بالطريقه التقليديه 👋....سطايفيه

[stayfiya]

السلام عليكم و رحمة الله و بركاته
اليوم حبيت نقدم درس فريد من نوعو
نظرا لانو كاين بزااف حابين يتعلمو لخياطه لكن بعيداً
عن تعقيدات الباترون و الحسابات و الضرب و الطرح
حبيت لي ماعندها حتى فكره تدخل و تتعلم ما يتوقفش الحد غير عند لي تفهم الباترون
باش ماتقولوش السطايفيه بخيله و تفهم غير طبقه معينه 😧
قلت لما لا نعلمهم و نوصللهم الفكره بطريقة امهاتنا واجدادنا في التفصيل
اكيد هي تصلح فقط لخياطة الملابس المنزليه و ليس السواريهات و الملابس الرسميه
ماتحتاجو والو غير لقماش و لمقص و حاجه تطراسيو بيها
و يديكم 👋👏👐👏طبعاً لأنو راح نعتمد القيس بالشبر و الاصابع
بالتقرييب هي قياسات صحيحه لكن ليست دقيييقه راح نقلكم
واش معناها و كيفاش نحسبوها و كيفاش نطبقوها على لقماش
طبعا حنا رانا نتكلمو على قيس المرأه العاديه متوسطة الطول و العرض
(ميش وحده تقولي يدي صغيره و لخرى يدي كبيره)
اذن راح نوضح القياسات
الشبر هو الاتساع (يعني تفتحي يدك للاخر )بين الإبهام و الخنصر(الاصبع الصغير ) و تقريبا =20سم

الفِتر هو الاتساع بين راس الابهام و السبابه (اصبع التشهد ) و تقريبا =15سم
الاصابع مثال اصبعين=3 سم
راح نطبق على ورقه باش تعرفو كيفاش نستعملوهم
راح تتسائلو كيفاش نطبقو لقماش حنا دايما نتبعو لا ليزيار لي هي
حاشية لقماش باش تكون على الجانبين بصح مرات نتبعو الرسمه
لي في لقماش و نضطرو تكون الحاشيه من اسفل و من اعلى

وباش جينا روبه بعرض مناسب راح نستغلو كامل عرض لقماش

لي تقول ما نعرفش قداش نشري قماش نتي شوفي طولك من لكتاف للارض و ما تنسايش
حق الكفه و لخياطه و شوفي المونش قداش طولو و على حساب طولهم راح تحددي قيمة
لقماش لي تشريه اوكي و تنحي حق المونش

و نطبقوه اولا على ثنين

و من بعد على اربعه اذا كان متر و نصف راح يجيك عرض الروبه شبر و ِفتر

غير لكان بغيتيها دروات بالشقه راح تنقصي في العرض
راح نبسطلكم اكثر بما اننا نخدمو بالدوران(دوران الصدرو الخصر و الحوض)
معناه راح نطبق لقماش على اربعه و نخدم بجنب واحد
باش مانتعبوش رواحنا و جينا فصاله متطابقه

بعدما طبقنا لقماش لازم نعرفو كيفاش نوضعو القياسات تاعنا على اليمين رسم توضيحي

الخط الاول من اعلى يمثل خط الكتف
عرض الكتف شبر يعني 20سم
اذن نجي على حافة الزاويه وين مطبقين الكتان ميش وين مفتوح
و نكيلو شبر داخل هاذ الشبر راح نعينو فتحة الرقبه لي هي
اربع اصابع او خمسه(على حساب الموديل او اذا كان مرا سمينه)
بالنسبه للخلف ننزل ب زوج اصابع و اما الامام ننزل بفِتر و زوج اصابع و هنا حسب
الرغبه لي تحب دير الرقبه دائريه او مربعه او قلب او مائله
في نهاية الكتف نحدد نقطه و ننزل ب باصبع
(كامل نعرف الكتف تاعنا جاي مائل ميش مسطح لذلك قمنا بالانحراف قليلا )
و هاذي زدتها من عندي. ما كانوش يهبطو كانو يديرولكتف قدقد 😜
و منو ننزل عموديا بشبر و زوج صباع (23سم) بالتقريب
(هنا لكانت مرا سمينه لازم تزيدي تهبطي سينون جيها مخنوقه )
انطلاقا من هاذ النقطه نخرجو ب 5صباع النقطه لي رانا فيها هي خط الصدر نتاعنا
باش ترسمي دورة الابط(الطابق. L'emmanchure) ديري خمس صباع فوق خط الصدر
و تخدمي الدوران تاعك يجي هايل (نورمالمون مكاش لي تقولي ما نعرفش ندور مدامك تعرفي دوري وحدة الكسره
هاذي ساهلة عليك ) 😝😝😝😝😝
نكملو نرسمو الخط الثاني لي هو خط لاطاي الخصر هو يبعد على خط الصدر ب وِفتر و زوج صباع
اذا كانت الروبه تاعك لارج ماتحتاجش تخصير يعني تضييق في لاطاي
كملي هبطي الخط تاعك من نقطة الابط لأسفل الروبه و اذا حبيتي طاييها
قيسي في خط الخصر شبر و 3صباع
بقى اخر خط و هو خط الحوض le bassin نعينو مكانو برك باش تعرفوه
هو يبعد على خط الخصر ب شبر يعني 20سم
باش تتاكدي من القيس تاع لاطاي و الصدر زيدي قيسي بالميطره و
اقسمي النتيجه على اربعه و الاضافه تكون من 2 الى4 ماتنسايش رانا نفصلو
في حوايج دار معناها الفضفضه لازمه
و اذا بغيتي تخيطي لطفله صغيره ماعليك غير تشبريلها هههه و طبقي عادي
ونكملو نطراسيو و كي نجي نقطع بالمقص لازم نخليو زياده واحد سم و لكان شايفه
روحك ما تتحكميش في لخياطه زيدي واحد و نصف و قطعي بالمقص الكفه من اسفل خليلها من 3الى5سم

لازم نلاحظو بلي رانا طراسينا الرقبه و قطعنا غير الخلف و مزال قماشنا مطبق على اربعه
اذن راح نفصل الامام على الخلف و نكمل نفصل رقبة الامام ( راكي معايا ولا دختي )😳😳😳

و هاذا شكلهم كي نحلو لقماش (واش رايك )

المونش راح نطبقو واحد عادي مبدئيا من بعد نطرقو لأنواع على حساب المودالات لي نختاروها
اذن الكم نطبقو لكتان على اربعه بحيث يكون عندنا طول و عرض شبر و نعمل ربع دائره بهاذ الشكل

و هاو وين يركبو لي مونش

ما طيشوش باقي لقماش نحتاجوه نبطنو بيه حواف الرقبه من امام و خلف
بصح الحصه الجايه نتعلمو كيفاش نخيطو و واش نزيدو باش جينا خياطتنا باهيه و متقونه
اي سؤال راني هنا و توضيح الاجابات راح يكون هنا في هاذ الصفحه باش مانتيهوش
من بعد بين الردود و الصفحات
تنبيه : لي يفهم بهاذ الطريقه و يتعود عليها راح يسهل عليه يتعلم الفصاله بالباترون
الان لي بغات طبق و نصححلها راني هنا و لي بغات تكتفي بالقراءه الله يسهل ماتلقاش فرصه كيما هاذي

الى اللقاء. و ما تنساوش دعواتكم لابي
سلااام