مقروض الشهدة بالتفصيل لكل من طلبت مني الوصفة

[*زهرة اللوتس*]

السلام عليكم و رحمة الله و بركاته هاذي وصفة مقروض الشهدة لكل من طلبتها مني أرجو أن أوفق في الشرح
مقادير العجينة 3 كيلات فرينة , 3 أرباع الكيلة مرغرين أو سمن ذايب و بارد , قرصة ملح , تدخلي المرغرين مليح في الفرينة والملح و تلمي بماء الزهر حتى تتحصلي على عجينة متماسكة و الشرط الأساسي هو تخلي العجينة ترتاح على الأقل ساعتين باش الشكل يبقى هو هو ما يتغيرش.
مقادير الحشو 3 كيلات لوز أو جوزمرحي رقيق أو الإثنين , كيلة ناقصة سكر عادي ,شوية قرفة و تلمي بماء الزهر و تخليه يرتاح و منبعد إذا لقيتيه يبس شوية زيديلو شوية ماء الزهر المهم تتحصلي على عجينة طرية تقدري تشكليها حربوش.
الطريقة بعد ما ارتاحت العجينة حليها حوالي 2 ملم على شكل مربع كبير و حطي على طرف العجينة الحشو على شكل حربوش سمكه حوالي 2 سم أو أكثر حسب الرغبة و ابداي رولي ديري زوج 2 دورات وقطعي بالسكين كيما في الصورة سامحوني الصور مش واضحة مليح

سقمي مليح الحربوش تاعك و خلي الحافة اللي قصيتي منها من تحت, غطي هاذ الحربوش بنيلون وكملي بنفس الطريقة على باقي العجينة كيما في الصورة


ضرك ابداي النقش بهاذ اللقاط الخاص " صورة من النت خاطركش اللقاط تاعي نسيت ما صورتوش خليتو في دارنا"



ضرك ابداي النقش بهاذ اللقاط الخاص " صورة من النت خاطركش اللقاط تاعي نسيت ما صورتوش خليتو في دارنا"
تنقشي كامل الحربوش بلا ما تنقشي من الجوانب خليهم منبعد ما تقطعي المقروضات و ابداي قطعي مقروضات بسكين حاد باش ما يفسدش الشكل تاع عش النحلة كيما في الصورة





حطيهم واحدة جنب الأخرى بحيث يكون الحشو الى الداخل باش ما ييبسش كيما نديرو في المقروض
طيبيهم في الفرن على درجة حرارة 180 وخليه حتى يحمار شوية برك من تحت و شعليلو من فوق بصح يبقى لونه أصفر فاتح باش يجي باهي كيما الشهدة



كي تخرجيه هكاك سخون حطيه في عسل بارد مخفف بشوية ماء الزهرو خليه 10 لى 15 د في العسل و مبعد حطيه في كسكاس يقطر بصح نصيحة و مني بالصح اقفلو النوافذ أنا النحل دار فيا حالة و الله شيء غريب
و اذا قعد ايامات عاودي عسليه قبل التقديم يعطي رونق و طراوة اضافية للقاطو
اذا عجبكم نتمنى دعوة خير ليا بالغيب و شكرا وأي استفهام راني هنا.



https://www.djelfa.info/vb/showthread...post3991815364