تحضيرات شهر رمضان الكريم

سمراء الدنيا · 2017-04-21, 23:35

باسم الله و الحمد لله و لا حول و لا قوة الا بالله

اللهم صل و سلم على سيدنا محمد عليه افضل الصلاة و ازكى التسليم

اللهم أجعل أيام شعبان وأواخر شعبان جابرة للقلوب،، ساترة للعيون،، ماحية للذنوب،، مفرجه للكروب...
اللهم شوقنا لشهرك الكريم.. فيــــــــــــــا رب لا تحرمنا نحن وأحبتنا من صيامه وقيامه...
اللهم بلغنا رمضــــــــــــــــــــان لا فاقديــــن ولا مفقوديــــــــــــن... آمين يارب العالمين

ها قد اقترب شهر الرحمة والبركه شهر تسابق عليه الانبياء

وسعى للعمل به الاولياء واجتهد في كسب اجوره الصالحين والاتقياء

وحتى نكتب ان شاء الله به من العتقاء لابد ان نستعد له بكم غزير
من الاعمال......و كما هو معلوم فان مسؤولية ربة البيت في رمضان كبيرة و كبيرة جدا ....و حتى تتمكن ربة البيت من ان تكون ملمة بدنياها و دينها فوجب عليها ان تسطر برنامجا خاصا يساعد ها على ان تحوز على رضى ربها و زوجها و ان تقوم بمسؤوليات بيتها و ابنائها على اكمل وجه دون ان تقصر في واجباتها الدينية .

و هذا لن يتحقق الا بالتجهيز المسبق و التحضير لكل ما يساعدها على التقليل من الوقوف في المطبخ اثناء الشهر الكريم حتى تتمكن من اداء واجباتها الدينية دون التقصير مع عائلتها و بيتها

هنا سأعرض لكم بعض تحضيراتي يمكن ان تفيدكم و في المشاركات التالية سأجمع لكم افكار كثيرة و متنوعة لتعم الفائدة باذن الله

في منطقتنا في الجنوب الغربي اول شيء نبدا بتحضيره هو دشيشة الزرع او الشعير
اولا نغسلو الزرع و نشروه حتى ينشف

و نظفوه من الحجارة و الشوائب

و نغيزوه اي ندقوه بخفة في المهراز لتكسير الشوكة الموجودة فيه و بعدها نفضوه في الطبق

و بعدها نغربلوه على مراحل

و ايضا من اهم الاشياء هي حشايش لحريرة
عادة تحضرها الام و تقسم على بناتها او العجوزة و تقسم على كناينها
مكوناتها

قرطوفة (وزوازة)

بسباس

ازير البل او ازير المر

حبة حلاوة

و اضافات اخرى كل واحد و الذوق نتاعو كاين للي يضيف فليو و كاين للي يضيف شويا الال و شويا زعتر
نطحنوهم و نكثرو القرطوفة و نقللو ازير المر نجددوها كل شهر رمضان و تبقالنا العام كامل (نفتلو بيها المردود في الشتاء)

و ايضا نفتلو الطعام على جال السفة للسحور و لسهرات رمضان لازم تكون حاضرة

هاذي التحضيرات الاولى للي لازم نبكرو بيها و بعدها تحضير لبهارات

و هاذو البهارات

الصور من السنة الماضية و ان شاء الله راح نشارككم تحضيراتي خطوة بخطوة
راح نوجد راس الحانوت و بزار القهوة

اول شيء بديت بيه هو الثوم يبستو و طحنتو البارح خدمت كمية صغيرة لانو العام للي فات قعدلي بزاف

كنت راح نطيب خبز و غراتان فقلت نستغل سخونة الكوشة و نجفف شويا ثوم و شويا فلفل عكري

يتبع

سمراء الدنيا · 2017-04-21, 23:36

******************************************

سمراء الدنيا · 2017-04-21, 23:36

************************

سمراء الدنيا · 2017-04-21, 23:37

جمعت من النت افكار جميلة للتحضير المسبق لبعض الاكلات

مع انا ضد التجميد و الاكل المجمد و الزوج تاني ما ياكلش الاكل المجمد ... لكنو ينفع في اوقات الازمات مثل المرض او ضيوف الغفلة و هذا عن تجربة ...
او اذا اضطريتي تخرجي في يوم رمضان لظرف طاريء مثل مرض احد الاولاد او غيرها من الاسباب لما ترجعي هلكانة تفتحي الكونجيلاتور و تجوزي هذاك النهار على خير
لكن كلما ساعداتك الظروف طيبي كل يوم بيومو
يمكنك تجميد انواع من الخضار اختاري العلب الخاصة بالتجميد تلقاي في ظهر العلبة مثلث فيه رقم 5 هذاك هو المناسب

الشهير عندنا الجزائر نجمدو الجلبان و الحمص مشمخ و الفلفل المشوي

تجميد صلصة الطماطم ينقص بزاف من الشغل

مؤخرا شفتهم يجمدو الطماطم مصبرة حتى ما ضيعش و تهزي قيس ما تحتاجي

فرم القصبر و تجميده

تجميد عصير الليمون

برش الجبن و تجميده

تجميد المعجنات

تعجني عجينتك المعتمدة و تخليها تخمر و من بعد تشكليها و تجمديها في صينية و تكون الاشكال متباعدة و بعدها تخبيها في المجمد

و البيتزا

و يمكن تحشيها بحشوات مختلفة

مثلا اذا كانت عايلتك من 6 افراد اشري 3 دجاجات نظفيهم و قطعيهم
6 افخاد تبليهم و خبيهم
6 مورصويات للي بقاو من الافخاد تعمليهم جواز شطيطحة او تحمريهم
6 اجنحة تبليهم و ديريهم طبق اجنحة
الصدور قطعي للغراتان و فرمي للحشوات
يبقالك القفص و الظهر عمليهم شوربات

التحضير المسبق للحريرة

يمكن تحضري قوام لحريرة من قبل و توزعيه على عدة اكياس و تجمديه و عند الحاجة تجبديه و ترميه في القدر مباشرة

ام منيب · 2017-04-22, 07:20

الله يبارك الله يبارك دايما سبااااااقة للخييير
ربي يجوز علينا رمضان بالطاعة و الهنا و راحة البال

الدر المكنون 7 · 2017-04-22, 10:11

اللهم بلغنا رمضان وانت راض عنا وارزقنا صيامه وقيامه كما تحب وترضى
يعطيك الصحة صليحة موضوع مميز في انتظارالتكملة
صليحة الازير هو اكليل الجبل ولا عشبة أخرى؟

ام هاديل وياسين · 2017-04-22, 21:27

اللهم بلغنا رمضان لا فاقدين ولا مفقودين واعنا على صيامه وقيامه يارب العالمين سمرا ء بارك الله فيك ديما مواضيعك هايلة
ومن عندك نشمو ريحة رمضان احنا الشعير نشروه واجد يعني تشيشة واجدة التوابل نقصت منها خاصة راس الحانوت منيش نستعملو غير احيانا
زعفران شريت راه عندي نتاع الشعرة وستغنيت نهائيا على هداك الكلوغون منهار سمعت بلي مضر راني نطيب غير بالكمون وزنجبيل والكركم وبغيت نسال على الفلفل الاحمر مرات نشريه على وحدة نعرفها تخدمو في دارها وكي يخلاصلي نضطر باش نشري نتاع السوق ميعجبنيش حطين فيه سباغة حمرا تسبغ في الاكل
بغيت تعطيني اي نوعية مليحة تعرفيها ولا موالفة تشريها

أم عائشة الجزائرية · 2017-04-23, 00:38

بارك الله فيك

شهر رمضان ليس للاكل انما هو توبة
اللهم بلغنا رمضان

غفران 2 · 2017-04-23, 11:31

اللهم ىبلغنا رمضان وانت راض عنا
بارك الله فيك اختي ديما نافعتنا

ام تينة · 2017-04-23, 11:40

احسن الله اليك حبيبتي سمراء
لا تنسي ان تشرفينا في دورة اللهم بلغنا رمضان نسعد بوجودك معنااااااااااااااااااااااااااااااااااااا

fati 17 · 2017-04-23, 12:37

اللهم بلغنا رمضان
يعطيك الصحة سمراء والبنات عجبتني فكرة تقطيع الدجاج وتتبيلو مشكورو لحبيبة

أم ايهاب 2013 · 2017-04-23, 14:35

يعطيك الصحة سمراء على المجهودات اللي راكي تقومي بيها...... حنا تقريبا كلش نشروه واجد..... راحت بنة رمضان انتاع زمان ...... رانا نستناو في باقي تحضيرات بلاك تبعثي فينا روح النشاط

ام شمسو محمد · 2017-04-23, 17:19

يعطيك الصحة سمراء الدنيا ...كاين تشابه كبير في الاستعدادات حتى اذا بعدت المسافات في جزائرنا الغالية ...احنا نخدمو الفريك و الفلفل المطحون و الفاحات ( ثاني توزعهم الام او الحماة هههه) نكهة رمضان متبلة بالاعشاب ...و نوجدو الزيتون و البربوشة ..في انتظار المزيد سمراء

cerina · 2017-04-23, 20:23

ya3tikoum saha kamel nchaleh yedkhel a3lina ramden bel ta3a

امّ اياد · 2017-04-23, 21:15

يعطيك الصحة على المجهود لي قمتي بيه عجبتني تحضيراتك وتاع تجميد انا ضدو وكيما قلتي يسلك في وقت ضرورة خاصة لي خدامة ربي يجازيك كل خير