عجينة صح سحرية لخبز الهومبرغر

fatimazahra09 · 2014-05-24, 20:32

وصفة جد ممتازة لخبز الهومبورغر ..... هي في الحقيقة و صح عجينة سحرية هاذو مقاديرها:
500 غ فرينة-1 م ك خميرة الخبز -1 م ك سكر -1 م ص خميرة كيمائية -1م ص ملح -3 م ك حليب بودرة - 1 بيض- 1 م ك خل - 6 م ك زيت - القليل من الماء الدافئ.
طريقة التحضير:
نديرو خميرة الخبز و السكر وشوية ماء ونخليهم 10د يطلعو... وفي ليان نديرو الفرينة و الخميرة الكيمائية و الملح و الحليب بودرة والزييييييييييت ونخلطو الكل ونخلوه بجيهة و هنا رايحين نقومو بالعرض السحري ... نحطو في علبة تتغلق مثل علبة المايونيز البيضة والخل و نغلقوها و نخضو مليح الخليط ونفرغوه فوق الفرينة والمواد الاخرى ونزيدو نفرغو الخميرة الي طلعت ونخلطو ونزيدو بشوية الماء ( ما لازمش تكون جارية بزاف .... كيما عجينة الاخت كوثر ) حتى نتحصلو على القوام المطلوب ادلكيها 5 د تكفي . فوتي على العجينة شوية زيت غطيها بكيس بلاستيكي على جال الزيت وديريها تخمر المرة الاولى . فشيها وشكلي كويرات بحجم حبة الخوخ و ابسطيهم شوية بيدك وحافضي دايما على الشكل الدائري للخبزة ... خليهم 10 د يزيدو يخمرو و دهنيهم بالبيض و شوية حليب و2 قطرات خل مخفوقين ورشي عليهم شوية جلجلان و دخليهم يطيبو في فرن محمى مسبقا على درجة 180° ماريحينش يطولو في الطياب 15 دقيقة لا اكثر ...بعدما يطيبو خرجيهم و خليهم يبردو شوية .. باش ما يتعجنش الخبز جيهة المنشار لنقطعو بيه... واحشيهم كيما حبيتي .
انشاء الله نكون فدت زميلاتي المشاركات بهذي الوصفة و صدقوني ما رايحينش تندمو عليها ... ونشاء الله نوعدكم بالصور

minoucha amina · 2014-05-24, 20:47

هايلة يعطيك الصحة اختي قوليلي اتجي هشوشة.

tong2 · 2014-05-24, 20:49

بارك الله فيك

omhadil · 2014-05-24, 20:51

يعطيك الصحة وبارك الله فيك اختى

fatimazahra09 · 2014-05-24, 21:01

جي هايلة وخفيفة ورايحين تحبوها .....انشاء الله ....ديرو النية وجربو ...راهي مضمونة 100/100 فوق هدا ماعندي ما نقول

أم إناس · 2014-05-24, 21:08

بارك الله فيك وجزاك الله خيرا

شقراء · 2014-05-24, 21:20

بارك الله فيك اختي

تينا ماريا · 2014-05-25, 05:45

شكرًا اختى على الوصفة

فايزة1207 · 2014-05-25, 07:59

يعطيك الصحة وبارك الله فيك اختى
نجربها في اقرب وقت

fofol · 2014-05-25, 08:07

مشكورة تسلم اديك

إلهام07 · 2014-05-25, 08:11

شكرا على الوصفة لكن عندي سؤال:
قلتي الوصفة فيها 6 م ك زيت لكن ماقلتيش وكتاش تحطيهم

عطرالذهب · 2014-05-25, 08:47

شكرا على الوصفة بالصح الزيت اللي تدهني بيه العجينة قبل ماتخمر هو الكمية اللي في الوصفة او تخلطيه من الاول مع المكونات
اجيبي رجاءا

الوردةالجورية · 2014-05-25, 08:52

مشكورة حبيبتي لكن سؤالي نفس سؤال البنات عن الزيت وقتاش انحكوه

fatimazahra09 · 2014-05-25, 09:29

حبيباتي الزيت يندار من الاول ....وكي تعجني وتكملي ادهني يديك برك بشوية زيت وادهني تاني العجينة وحطيها تخمر ...صدقوني درتها مش مرة مش زوج ...وما نبدلهاش انشاء الله ...راهي تصلح لكل المعجنات ايضا ....شكرا لكم مسبقا

فايزة1207 · 2014-05-25, 13:50

شكرا على التصحيح ديري برك تعديل في الوصفة