من مطبخي أحلى و أروع كرواسون مقرمش و مورق أحسن من المخابز

walido2011 · 2017-01-25, 21:56

السلام عليكم أخوااااات

بعد طول غياب بسبب الدراسة جبتلكم اليوم وصفة الكرواسون هايلة وناجحة وديما نعملها خاصة انها تجي مورقة و مقرمشة، و عندي وصفات أخرى عملتها و ما حطيتهاش في المنتدى أريد بعض التشجيع منكم أخوات لأني أحضر لموسوعة حلوياتي و نحطها في أقرب وقت انشالله

نبدا بالمقادير:

رطل فرينة
2 ملاعق كبار سكر
2 ملاعق كبار حليب بودرة
ملعقة صغيرة ملح
فنجان زيت
ملعقة صغيرة محسن الخبز
فانيليا البودرة أو الخاصة بالعجين
ملعقة كبيرة خميرة الخبز
2 حبات بيض(وحدة للدهن)
250غ زبدة أو المرغرين الخاصة بالتوريق

الطريقة:
نخلط الفرينة السكر الحليب الملح و الزيت و الفانيليا حتى يتجانسو، ثم نضيف الخميرة و محسن الخبز و نخلط و في الأخير نضيف البيضة و نجمع العجينة بماء دافئ و نعجنها من 5 إلى 10 دقائق حتى نتحصل على عجينة ملساء وطرية نخليها ترتاح فالثلاجة مدة 15 دقيقة.
نأخد المرغرين و نطريها في ورق الزيدة و نحلها بالحلال، نخرج العجينة من الثلاجة و نحلها بالحلال لازم تكون أكبر من حجم الزبدة، نحط الزبدة في وسط العجينة، ونغلق كامل الحواف مثل العجينة المورقة (فقط هادي تسمى بالعجينة المورقة المخمرة، أو البريوش المورق) نحلها بالطول ثم نغلق جزء من الفوق لنصف العجينة و الجزء الثاني من الأسفل إلى فوق الجزء الأول وندخلها الثلاجة 15 دقيقة و هدا الدور الأول، الكرواصون فيه 3 أدوار يبقاولنا 2 نعاودهم كيما الدور الأول، بعد ما نكمل الأدوار 3 نحل العجينة بالطول و بالعرض إذا تحبوهم صغار، واذا تحبوهم كبار نحل العجينة فقط بالعرض ونقسم مثلثات مثل الشكل لي راه فالصورة و نشكل الكرواصون و ندهنو ببيضة مضروبة مع ملعقة صغيرة سكر و نخليه يخمر لمدة ما بين 30د إلى ساعة في مكان دافئ و نطيبهم في فرن ساخن على 220 لمدة ما بين 20 إلى 25د كي يطيبو نرش عليهم سكر غلاص(اختياري)

شوفو كيفاش مورق

أتمنى ان تعجبكم الوصفة و انتظروا موسوعتي