عاونوني في خبز الدار بالسميد فقط

maiar · 2013-07-18, 15:55

السلام عليكم و رحمة الله و بركاته

راني نشوف في وصفات الله يبارك كل وحدة تنسيك في اختها تع

الوصفات خبز الدار بصح لاحظت بلي كامل محسوب فيهم الفرينة

اذا ممكن تحطلنا كل وحدة وصفتها تع خبز الدار تع السميد

و صح فطوركم

وليد مولودية · 2013-07-18, 16:00

حنا نديرو خبز الدار سميد برك

السميد عينك ميزانك

مغرفة سكر
مغرفة خميرة عجين

ملح

زوج بيضات

سانوج

شوي زيت قيس فنجان معمر

ماء زهر

نعجنوه مليح و نحطوه يرتاح و ممبعد نكسرو له الطلوع و نعاودو نعجنوه

نقسموه قرصات

ندهنو الصينية بالزيت و نقرصوه

نخلوه يخمر

ندهنوه بالبيض

نسخنو الفور

ونحطوه يطيب

ميمنة الجزائر · 2013-07-18, 16:08

حبيبتي خبز الدار تاع ام اماني تقدري تديريه بلا فرينة خلاص

وشنو هزي قبل مغرفتين فرينة مع ملعقتين سكر وملعقة كبيرة خميرة الخبز وحطيهم في كاس مع ما تياد وخليهم يطلعو

من بعد ديري السميد وشوية نشا ايه نشا كاس نشا ولا حبيبتي تستغني عليه استغني لكن النشا مليح يخليه مفتفت

وديري فنجان زيت وحبة بيض وبياض تاعها و ومن ذ والسينوج والجلجان ولميهم مليح بكاس حليب والباقي بلي بالما

واعجنيه كي تخمر الخميرة لميه ولميه مليح في الاول يعني شغل تخليه فيه ومن بعد ولي ديريه في كيس مبلول

وحطيه ر وفي الاخير كي تشوفيه طلع ولي لميه بملعقتين زبدة تكون طرية برك وحطيه في بلاطو وشكليه على شكل وردة

ولا وش بغيتي يجي رووعة وعن جد تحفة

وهذا هو الشكل

التلميع ديري صفار مع شوية خل مع شوية قهوة وديريه من فوقو كي يخرج من الفرن جيبي بانسو وادهنيه بشوية حليب شغل تزوقيه برك باه يخرجلك يلمع

انتصار فاطنة · 2013-07-18, 16:55

احنا خبز الدار عندنا نديروه غير بالسميد ونزيدولو الزيت حتان يتبسس مليح +ملح +سكر +حليب لحظة غبرة +سانوج +جلجلانية ونخلط مليح ونضيف الخميرة ونعجن بماء دافيء ونتركها تخمر بعد ما يكون تخمر ندلكوه مليح بالحليب والزبدة ولازم يكون العجين مطلوق ثم نقرصوهم ونرسمو اشكال هندسية وندهنوهم بصفار البيض ونذري السانوج والجلجلانية ونطيبوه في فرن مسجن مسبقا والاغلبية يبعثوه للخباز لاننا ما نديروش خبزة وحدو وانما خبزات ونتمنى تجربيه

maiar · 2013-07-18, 23:19

بارك الله فيكم محسوب نفس الطريقة لي تعتمدها امي
ميمنة هذا الخبز يشهي الله يبارك نعرفها خدمة يديك

أم رمزي · 2013-07-19, 01:24

المقادير:

06كيسان سميد أنتاع اينوكس رقيق

01كاس زيت

سينوج

فنجان أنتاع القهوة خميرة الخباز

ملح

ماء الزهر

شوية زبدة او سمن

ماء دافئ

بيضة

شوية حليب

الطريقة:

تحطي السميد في قصعة تحطي الزيت , الملح السينوج , وتحكي بيديك مليح , وتحطي الخميرة اللي راكي حطيتيها

تطلع في كاس , تصبيها في الخليط و تبليها مليح بشوية ماء دافئ من بعد تحطيها في كيس بلاستيكي و تغطيها

بسرفيطة و خليها ثخمر مليح , عجنيه بيديك او ضعيه في عجانة , ومن حين للاخر أرشيه بالماء الدافئ حتي تحصل علي عجينة طرية كملي أرشي بماء الزهر و شوية زبدة و البيضة و عجنيه مليح مليح حتي تتحصلي على عجينة ملتصقة,

جيبي الصينية أنتاع الفور ادهنيها بالزيت, وديري كويرة مستديرة أطرحيها ثم وشميها بالفرشاة و غطيها و خليه يطلع أي يخمر ثم أدهنيه بالبيض و حطيه في الفور اللي سخنتيه من قبل.

:

oum didou · 2013-07-19, 10:51

أنا نخدمو بوصفة ميميشة لكن بالسميد فقط أي كمية الفرينة نزيدها سميد روووووووووووووووووووووووعة

سارةالتلمسانية · 2013-07-19, 13:10

بارك الله فيكم

maiar · 2013-07-19, 23:18

شكرا بارك اله فيكن

امل الطارف · 2014-08-11, 19:02

الله يبارك فيكم