زريرة تشهي

ام راضية · 2013-06-02, 12:06

تحياتي اخواتي وان شاء الله تكونو بخير
عملتها فطور للاولاد حبيت نوريهالكم ونعرف بيها اللي ميعرفوهاش

هدا صحن زرير هدية لكل اخواتي
هده وصفة تقليدية اساسية وضرورية جدا تحضرها المراة لنفاسها لضيوفها
وكدلك اللي تحب تحضرو لاولادها لانه مفيد جدا للاطفال خاصة في مرحة النمو
واللي عندها بيبي راح نقلها كيفاه تعملو واكيد راح تتدعيلي
في تبسة كاين اللي يسميها زرير وهم الاغلبية وكاين اللي يسموها سويكة وانتم واش تقولولها كان تعرفوها
هي تحضر من القمح يتحمص في الطاجين ويترحي في للطاحونة نساء زمان كانو يرحوها في الدار
ها هو شكله

طريقته الشهية
ندوب الزبدة

كي تدوب نضيف العسل ونخليه يدوب معاها
ننزع الاناء من النار

وبدا نضيف بالعقل السويكة

ما لازمش تكون ناشفة ولا جارية وهدا شكلها التزيين باللي عندك جلجانية محمصة او مكسرات

للامهات اللي عندهم بيبيات هده الوصفة نافعة جدا لنموهم تخلطي في بيبرون مغرفة مع الحليب لاطفالك مكان اللبنامين واتفكريني وادا كان ابنك تجاوز العام ديريهالو يفطر بيها بالحليب ومغرفة عسل
بدون ان انسي كبار السن راي مليحة ياسر خاصة لهشاشة العام
وهده عن تجارب امهاتنا واجدادنا
ادا عجبتم الوصفة ما تنسوش دعوة خير في قلوبكم تكفيني

غزة في عيوني · 2013-06-02, 12:45

امممممممم هايلة حنا مانديروهاش بالعسل والزبدة نديروها بالماء الدافيء والسكر عادي انشاء الله نجرب طريقتك الله يعطيك الصحة

leila-alger55 · 2013-06-02, 12:45

ahna felasima asemha tamina laken na3amlouha bla semoul normal w befs tarika

ام فريال · 2013-06-02, 14:23

هايلة ربي يحفضك

أم سراج الدين · 2013-06-02, 15:17

نفس طريقتنا في قسنطينة
فقط الزبدة نديرو نص زبدة عادية و نص زبدة تاع البقرات و كذلك العسل نديرو نص عسل عادي و نص عسل حر
خصوصا للنافس اممممممممممم

بشرى2008 · 2013-06-02, 16:01

مشكووووووووورة صح تجي هايلة كاين اللي يسموها البسيسة وكاين اللي يسموها الروينة

أم ياسين الزهراء · 2013-06-02, 16:50

اممممممممممم نحبها بزاف اهنا يسموها الروينة ويديرو معاها الحمص يحمصوه ويرحوه مع القمح اممممممممممممم سخفتيني مواضيعك دايما يسخفو وينوضولي السخفات ههههههههههههههههههه وانا سمينة لكان غير مشيانة ههههههههههههههه

الصوامعية · 2013-06-02, 17:31

يعطيك الصحة عزيزتي ام راضيه يا صاحبة المواضيع المميزة دائما تعرفينا على أطباق تقليدية نابعة من التراث
في الأول كي شفت الصور معرفتهاش
بصح كي قلتي تحضر من القمح ويترحي في الطاحونة عرفتها
حنا نسموها الروينة نحظروها بالسكر والماء دافئ فقط
بارك الله فيك

حياتي نبع امل · 2013-06-02, 18:10

يعطيك الصحة حنا نسموها الروينة وكيما قالت الاخت نحضروها بالماء الدافىء او الحليب الدافىء

سحر الكلمات · 2013-06-02, 18:16

مممممممممممممم شهيتينيييييييييييييي روعة

soriaalg · 2013-06-02, 18:30

مممممممممممممم يعطيك الصحة اختي ام راضية تختلف الاسماء علابالي ما نعرفهاش بصح من الصور راني عرفتها لكن الطريقة صح ما نعرفش كيفاش يخدموها كنت ناكلها وخلاص ههههه بارك الله فيك

رنيم الجزائر · 2013-06-02, 18:51

جربوها و عمركم ماتندمو عليها

تجنننننننننننننننننننننننننننننننننننننننننن نمووووووووووووووت عليها عندها وحد البنة تلقي روحك كليتي عشرة صحونا بلا ماتفيقي ههههههههههههه

يعطيك الصحة أختي و ربي يوفقك
مواضيعك في القمة

انمي · 2013-06-02, 19:34

شكرااااااااااااااا

SAMAH SAMAH · 2013-06-03, 11:22

بارك الله فيك
وجعل ما تقدمه من موضوعات
في ميزان حسناتك
ويجمعنا بك والمسلمين في جنات النعيم
دمت بخير .. اللهم آمين

لمسة حنية · 2013-06-03, 15:19

يم يم شهتيني حنا تاني نعملوها بنفس طريقتك اختى والله خسارة معنديش القمح كنت درتها درك بصحتك