مساعدة

ام قابيل · 2014-06-22, 20:13

السلام عليكم ايتها الغاليات ارجو منا الاختا الصوامعية تقول لى ان كان صنع الديول بالمايزينة او فرينة الماييز لان ماما مريضة بالسيلياك حساسية القمح

fatimazahra09 · 2014-06-22, 20:26

وصفة الاخت الصوامعية هايلة مجربتها
و عندي سلفتي الله يحفظها سيلياك حتى هي انا نقول يصلحولك بالمايزينة والله اعلم
مادام فيهم الزيت رايحين يجو طريين ان شاء الله
انتي جربي ربع الكمية و شوفي
ربي يجيب الشفاء

ام قابيل · 2014-06-22, 20:36

ربي يحفضك حنونة

fatimazahra09 · 2014-06-22, 21:01

اقتباس:

المشاركة الأصلية كتبت بواسطة ام قابيل

ربي يحفضك حنونة

و نزيدك فكرة اخرى احسن واحسن
حطي مكان السميد والفرينة ..... فرينة الارز.... و لي يستهلكوه لي سيلياك .....الارز لي نديرو بيه المحلبي و هادي المقادير تبعيها ونستناك رديلي جواب كيفاش جاوك
هادي الوصفة :
ديري 200 غ سميد + 50 غ فرينة + 2 م ك زيت + قرصة ملح وزيدي الماء حتى تشوفيهم كي عجينة البغرير لكن شوية جارية خليهم يريحو 1 سا على الاقل كل ما ريحو رايحين يجوك ملاح ... وكي تبداي طيبي لاشفتي الخليط ثقال زيدي الماء ماكانش مشكل
هادي وصفة الديول بالسميد والفرينة مجربتها
وديريهم على مقلاة تيفال و بالبانسو نتاع السيليكون و كي تنحي الحبة غطيها بسربيتة ...

ام قابيل · 2014-06-22, 21:08

يا اختى ربي يسترك انشاء الله قوليلى واش ماالسميد لى نديرو

fatimazahra09 · 2014-06-22, 21:24

اقتباس:

المشاركة الأصلية كتبت بواسطة ام قابيل

يا اختى ربي يسترك انشاء الله قوليلى واش ماالسميد لى نديرو

ما ديريش السميد و الفرينة كامل حطي 250 غ فرينة الارز لي نديرو بيها المحلبي هديك تلقايها مطحونة مليح
والله يا اختي جاتني الفكرة كي تفكرت انو الشعب الاسياوي ... الجوابنا و الصينيين يعملو الديول بصح بهاد الطريقة و حتى الفارميسال شينوا ننصحك تشريه هايل و طيبيهلها شربة في رمضان ان شاء الله رايح يساعدها بزاف
كاش سؤال راني هنا

fatimazahra09 · 2014-06-22, 21:55

إعداد وطبخ شعيرية الارز في البيت
يمكنك تحضير شعيرية الأرز في البيت وإعدادها بسيط للغاية.تبداي مع الأرز الأبيض نقعيه في الماء لجعله لين قبل ما تطحنيه. تتحصلي على بوريه لي تنقعيها هي الاخرى في الماء لعدة ساعات. بعد ذلك رايحا تتحصلي على سائل ابيض يستخدم السائل الابيض لعجن الفطائر.اي لي كراب و نتي رايحا طيبيهم بنفس الطريقة
ارفدي مقدار 1 لوش وفرغيها في مقلاة و خليا طيب كي البغرير كي تكملي خليها تجف في الهواء كيما ينشف الكسكس و الشخشوخة قلت يجف في الهواء الطلق قبل ما تقطيعها رقيقة في ماشينة الرشتة و تزيدي تقطعيها على الاقل 10 سم او 5 سم
طيبيهالها شربة او حتى بوراك خلي الورق هاكداك ما تتفوتيهمش في الرحى لكن اخدميهم بالبانسو باش يجوك رقاق
و هنا نقولك كيفاش تخبي و تحافظي على الشعيرية الأرز
يتم الاحتفاظ الشعيرية الأرز بتفليفيها في فيلم اليمونتار و تتخبى في المجمد . يمكنك الاحتفاظ بها عدة أشهر. جديدة، وتقدري تخليها في الثلاجة 48 ساعة.
ان شاء الله نكون عاونتك وما تنساينيش في دعوة نتاع خير من القلب طبعا

ام قابيل · 2014-06-23, 15:24

ربي يعطيك قع واش تتمناي انشاء الله راكى عطيتينى افكار هايلين

fatimazahra09 · 2014-06-23, 17:55

اقتباس:

المشاركة الأصلية كتبت بواسطة ام قابيل

ربي يعطيك قع واش تتمناي انشاء الله راكى عطيتينى افكار هايلين

ترقبي حبيبتي اليوم في الليل .... ريحا نحط واش راكي تحوسي
من اجل عيونك الحلوين وقولي للميمة تدعيلي بدعوة الخير ......سلام حبيبتي