السلام عليكم و رحمة الله و بركاته ليوم جبتلكم طريقة تحضير شخشوخة الضفر من الالف للياء نبداو أولا بتحضير العجين لي هو عبارة عن سميد و ملح و نلم العجين بالماء حتى نتحصل على عجينة شادة روحها، نخليها ترتاح شوية من بعد نعجنها مليح حتى تتحصلي على عجينة ملساء و تعمل فرقعات صغيرة عند العجن لتم تتأكدي انو عجينتك معجونة مليح، نقسم العجين الى كويرات بحجم حبة البرتقال، من بعد نحلها بالحلال بسمك3 مم تقريبا، ونديرها فالطاجين، مالازمش نطيبوها بزاف، يعني قيس ماتنشف فقط لعجينة و نحوها من الطاجين، من بعد كي تبرد نشخشخوها كما توضح الصور ناتي الان لتحصير الصوص لي تكون حمراء. المقادير هي قطع لحم انا استعملت لحم بقري و دجاج، حبة بصل محترمة، سنينات ثوم، جزر، جريوات، لفت، فول، ملعقة طماطم مصبرة، حبة طماطم مرحية، كابويا انا نرابيها باش تذوب تماما و تعطيني صوص بنينة و خاترة،غلفل حار، حمص التوابل هي ملح، فلفل أسود، راس الحانوت. لما يطيب اللحم نتاعي، نجيب الشخشوخة، نديرها في قصعة و ندهنها بشوية زيت، و نحطها فالكسكاس تفور، لما تفور مليح، نرجعها للقصعة و نسقيها بالرق لي حضرتو و هي سخونة و المرق سخون و نغطيها و نخليها تتشرب مليح. وقت التقديم، نحطها غي صحن مزين بالخضر و قطع اللحم و نزيد نسقيها بالمرق. نتمنى تعجبكم طريقتي و تشجعوني و لو بكلمة بسيطة، الى اللقاء.