السلام عليكم ورحمة الله وبركاته بسم الله والصلاة والسلام على رسول الله الشكر لله والأخت زينب على إتاحتها لنا هده الفرصة الجميلة ومجهوداتها في احياء هدا الركن...بارك الله فيك اختي زينب فأحببت أن أشارك معكم في هده المسابقة الممتعة والتي نتعرف من خلالها على موروث أمهاتنا وجداتنا من الطبخ العريق والأصيل والتي تزخر بها ولايات الجزائر الحبيبة من الشمال إلى الجنوب ...ومن الشرق إلى الغرب اخترت من بينها طبق من شرق الجزائر من الساحرة جيجل معشوقة الملايين وملهمة الشعراء والمحبين....طبق البورديمة ..في طريقه للاندثااار معروف بكثرة عند أهالي العوانة تكسانة سلمى يشبه نوعا ما للبركوكس لكنه يختلف في طريقة فتله وطريقة تحضيره المهم ناس جيجل ينوعو في طريقة تحضير البركوكس فنجد بركوكس يحضر بالفول اليابس وآخر بالسلق وآخر بعشبة واسمها اربيط. .بركوكس بالخليع..بركوكس بالخضر..بركوكس بالحليب والدهان ووو صراحة انا مانعرفش نفتلو فتلتهولي خالتي ربي يحفظها يجي رقيق شوية يعني نفس طريقة فتل بركوكس برك الحبات مانطلعوهومش خشان حتى اني اول مرة نحضرو بإشراف امي ربي يحفظها هي تجييد ذلك ... وحضرتو خصوصا لهاذ المسابقة للتعريف به لأنني بحثت عنه في النت ولم أجد له اثرا ندخل في تحضير طبقنا المختار نحضرو مرق بصل توم وتوابل ف حار وعكري ورأس الحانوت نقلي مع قطع اللحم وجاج وكي يتقلاو شوية نضيف طماطم حب ومغرفة ماشي معمرة مصبرة كي يتقلاو مليح نمرق ونلوح الخضار حبة بطاطا حبة لفت حبة قرعة حبة جزر نرحوهم فالمرق وحبيبات اوقطع فقطللتزيين انا ماهدرتش القرعة ماعنديش نفورو البورديمة تاعنا مرة الاولى عادي مدهون بشوية زيت نفوروه ونعاودو نشمخوه كيما الطعام وندهنوه بالزيت ونعاودو نفوروه المرة الثانية وخلاص نولو للمرق نرحو الخضر نتحصلو على مرق خاثر نوعا ما نسقو البورديمة تاعنا فالكسكاس ونخلوه يتشرب ومبعد نقلبوه فجفنة وندهنوه بزيت الزيتون ونزيدولو زوج فصاص ثوم مرحي يعطيه نكهة خيااااااااال ونقدموه مع شوية مرق كاضافة هو يتكل هكداك بصح كاين اللي يزيدلو شوية مرق