انا خيطت نفس الموديل و نفس القماش لكن باللون الاخضر الفاتح الا اني عملت فلقات في الفستان من تحت و الكم عملتو طويل كيما فساتين حريم السلطان لكن انتوريتو كامل بالجريدة - الجريدة تتخدم في شكل غالون على حسب لون القماش و تجي من شرائط الساتان الا ان الموديلات الجديدة تخلات عليه و بدلاتو بالعقاش الا اني ضد هاد التغيير لان الجريييييدة هي الي تعطي للفستان النايلي العربي الصحراوي طابعه الخاص خالو حال القفطان المغربي ادا نحينالو الغالون يولي جبة دار او عباءة .......... المهم هادا هو الموديييييل بتصوييييير الاخت فيفي السكيكدية ربي يحفظها تعرفو في القريب العاجل راح نجيبلكم موديلات نايلي لاني راني بصدد تصويرهم من عند خياطة ادا سمحتلي طبعا اما عن الاكسسوارات الي تجي مع النايلي عدنا .... الجبين و هو قطعة دهبية تغطي الجبهة اهنا العروسة حطاتو كتاج الا انو لازم يكون يغطي الجبهة - السخاااب و السخاب هو عقد يصنع من مزيج الحنة و البرييون و العطر حباتو تزيد تفوح باريج يغطي العروس العروسة في الصورة جطاتو في الكتف الايسر يجي كروازي ادا كان طويل او في الرقبة - الملحفة هي تشبه الطرحة اتجي فوق راس العروس حطتها العروسة في الصورة تحت الكوافور - الشماسة برووش مثل البزيم الا انها في شكل شمس راها معلقتها العروسة في الصورة في الكتف الايمن ارجو اني عطيتكن لمحة عن الزي العربي -النايلي - الي منستغناوش عنو في الاغواط