وحد المرة وانا نقرى في السيام كانت الشيخة تاع العربية تاعنا ناس ملاح بزاف وعاقلة لدرجة انها ماعندهاش شخصية وفي واحد الحصة دخلت ولقات القسم كامل يعيط اومبعد بدات في الدرس وانا نقعد في اخر طاولة وبجنب الحيط يعني موقع استراتيجي لاثارة المشاكل بدون ما يحكمني حتى واحد وهي تشرح وانا دايرة روحي نعيط على الولاد الي يهدرو نقوللهم خلو استاذة تشرح والله ما تحشموا تلفت للصبورة وتبدا تكتب وانا نبدا نرمي الاوراق على البنات والولاد ونوض الحرب ونبدو نربو على بعضانا وكي تفيقنا وتلفت تلقاهم كامل يضربو في بعضاهم وانا نكتب ونتبع معاها في الدرس بكل براءة انا ابليس يقلي شيختي تقلهم شوفو زميلتكم كيفاش عاقلة وتكتب وانتم ماشي مربين ةتقصدني انا بهدرتها وكل يوم هكدا حتى وحد النهار وهي تكتب جيت نرمي في حبة حلوة لصاحبتي الي تقعد في الطاولة الاولة ماشي تجي على راس الاستاذة وتلفت وتلقاني نضحك قاتلي انتيا العاقلة والقراية تاع القسم وين نتفكر هداك النهار نتمنى راهي الارض تحلت وبلعتني