[زبدة ذايبة]

الحكاية هذي فيها "إن"

مستحيل زوج أختك هذا ماعندوش علاقة بهذا الخاطب من قريب أو بعيد

واحتمال كبير جدا لو يحدث الزواج هذا رايحين تكتشفوا حاجات على زوج أختك

بالتالي الحل الوحيد اللي عندو هو أنه يقطع ويمنع هذا الزواج حتى لا ينكشف أمره

أختك المتزوجة اللي راهي في مهب الريح للأسف

يسمح فيها راجلها بكل سهولة وهي عندها إبن

غريبة هذ القصة !!!!!!!!!!!!!!!!!!!

أنا من رأيي مايهمكش زوج أختك نهائيا

راكي 35 سنة ماراكيش صغيرة

ماتضحيش بنفسك على جال واحد جاتو الطكوكة في راسوا

إذا كان هذا الإنسان اللي تقدملك صالح، توكلي على الله

كاين بنات راهم يسناو غير تبطلي انتي تجي وحدة في بلاصتك ، ماكالاه تضيعي الفرصة من يدك

وحاولي تقنعي أختك أنه إذا هانت هي عند راجلها لهذا الحد يجي النهار اللي يسمح فيها وراهو سامح فيها على كل حال

واهدري مع الأم تاعك وأبوك وإخوتك

ماتبقايش تفكري وحدك

أهلك هما عزوتك، وهما اللي تلقايهم

ماتبقايش مع راجل عندو إسم زوج الأخت وهو يهدد فيها بالانفصال على حاجة بسيطة ماعندو مادخلوا تتزوجي بسعيد ولا بوزيد

ماتستسلميش للإبتزاز تاعو

غدوة يدير فيكم رايو

ورايح يدخل روحوا في حياتك الزوجية ويولي هو اللي يحكم فيك وفي داركم

ماتحوسيش عليه

يخبط راسوا في الحيط

إذا تنازلتي الآن رايحة تبقاي طول عمرك تتنازلي

ويعلم الله إذا تجيك فرصة ثانية للزواج أو لا

وهذا هو الوقت اللي تتزوجي فيه ويكون عندك أولاد إن شاء الله

وأختك قوليهلها الزواج اللي يستمر تحت الخوف والتهديد ماراهوش زواج

خير تحط النقاط على الحروف من الآن

على كل حال زوج أختك عندو حاجة مخبيها لدرجة قادر يخرب دارو على جال ماتبانش هذ الحاجة

الله أعلم وش هي

لكن هذ المصاهرة اللي راهي رايحة تتم بينك وبين هذا الخاطب ماتخدموش نهائيا ورايحة تتسببلوا في مشاكل وربما فضائح

أنا إذا تاخذي برأيي

أولا ماترفضيش إذا كان الخاطب صالح

وثانيا عليك وعلى أهلك ماتبقايش وحدك مايحقركمش راجل اختك ( انتي واختك)

وقفوه عند حدو يعرف بلاصتوا

درتولوا قيمة وهو مايستاهلش

ماعنديش وش نزيدلك

ممكن باقي الأعضاء يعطولك رأي آخر يفيدك خير

نتمنالك كل التوفيق