البيتزا انا هي رزيقة
انا موالفة ندير البيتزا تاعي بعجينة العشر دقائق ... تجي هشيشة و بنينة و كلشي ..... ندير كاسين مائ دافئ( او كاس ماء و كاس حليب ) و نزيدلهم 2 ملاعق كبار خميرة الخبز و و ملعقة كبيرة سكر و كاسين فرينة و اخليهم يخمرو حوالي 10 دقائق ثم زيدي عليهم 3 كؤوس فرينة و ملح حسب الرغبة و نصف كاس زيت ....
اما بالنسبة للصوص طوماط عندك الاختيار ما بين وصفتين كاين تع الخدامات بحالي اكسبراس هذي موالفة نديرها بزاف تسلك تع الصح ....... خخخخخخ ندير ملعقتين كبار طماطم مصبرة في صحن عميق نزيد عليهم ماء حتى تولي بالقوام المطلوب و نزيد حوالي 2 ملعقة كبيرة زيت زيتون و ملح و فلفل اسود و زعيترة و حبة ثوم رابي و نخلط كلشي مليح و نطلي البيتزا تاعي هذي تع المزروبات بحالي .. و كاين الوصفة الثانية ديري بصلة رابي و حبة ثوم رابي و حوالي 4 حبات طماطم رابي و ملعقة طماطم مصبرة و حوالي 3 ملاعق زيت زيتون و ملح و فلفل اسود و ورقة رند و زعيترة ... تحطي كلشي على نار هادئة حتى تعقاد الصوص .