السلام عليكم ... شكرا أم متين على الدعاء ربي يحفظك و ان شاء الله لك بالمثل ...
بالنسبة للنصائح لي مدتهوملي حبيبة يعطيها الصحة راني طبقت البعض منها و لقيت النتيجة هايلة مثلا تخت البوطاجي لميت الأغراض كل صنف في علبة مثلا الروبو و الميكسور تاع البرا و الباتور و الميزان نظفتهم و حطيتهم داخل هلبة بلاستيكية كبيرة تتغلق هكذا تهنيت من الكراطن تاعهم و كل حاجة وين تترمى
لميت كل الطوابع تاع القاطو و ليكيسات و لي غوم و الملونات ... في علبة مغلة ايضا تحت البوطاجي
لميت لي تورنوفيس و البلونات و المسامير و البانس و الكلاب .... في علبة مغلقة تحت البوطاجي
لميت كل شيء يبقالي في أكياس بعد ملأ العلب من حمص و سكر و معجنات و قهوة ..... علبة بلاستيكية مغلقة تحت البوطاجي أيضا
لميت كل المغارف الكبار و الصغار و الفراشط جدد غير مستعملين في علبة بلاستيكية صغيرة مغلقة ايضا تحت البوطاجي
بالنسبة للعلب استغليت علب مسحوق الغسيل لو شا le chat كانو عندي غسلتهم و نحيتلهم الكاغط لي فيهم و نشفتهم و حطيت فيهم أدوات الحلويا و الثانية حطيت فيها واش يبقالي في أكياس من حمص و سكر و عجائن و بن ....
زدت فرغت الدقيق و الفرينة و المايزينة و الطعام ..... كل حاجة في دلو صغير بالغطاء تاعو
بالنسبة للقدور و الطناجر درت كل حاجة صغيرة داخل الحاجة الاكبر منها و غطاء كل قدر لميتهم في علبة مستطيلة الشكل حتى يسهل العثور عليهم
اصبحت الحالة منظمة بالنسبة لواش كانت من قبل مع العلم الرفوف لم تركب بعد من بعد نشوف كيفاش نركبها ان شاء الله
غسلت الكويزينيار و الحمد لله بعد جهد جهيد تمكنت من تفكيك زجاج الزجاجو غسله جيدا بالاضافة لخلف الكويزينيار و نظفتها ايضا و رجعت كل حاجة لمكانها و غسلت نافذة المطبخ و غسلت الفايونص تاع المطبخ و غسلت الثلاجة من الخارج فقط لانها من الداخل نظيفة تحتاج فقط مسحة خفيفة و اعادة ترتيب فقط
غسلت علب التوابل و الرفوف تاعها و نشفتهم و اعدت ترتيبهم
تحت البوطاجي مازالت جهة فقط لي نحط فيها زيت الزيتون و الصحون لي ما نستعملهاش دائما هادو قلت حتى نشري سيلوفان و نغلفهم بعد ما نغسلهم
و غسلت تحت البوطاجي ايضا وين دايرة سلة للصحون و الكؤوس اليومية انا ما نحبش نحطها فوق البوطاجي لأني نفضلو فارغ هكذا يبانلي مرتب ��
بالنسبة للثلاجة لما غسلتها من برا لقيت فوقها معمرة غبار لذلك حطيت قطعة طوانسيري فوقها لتجنب توسخ الثلاجة من فوق و نظفت البانينوز و حطيتها فوق الثلاجة و جنبها سلة الخبز
واش تاني !!! المهم الموزينة الآن راهي تشعل مازال حاجات خفاف ان شاء الله صح تعبت بزاف و كنت نعمل و نسيل بالعرق و نمشي بالقرعة تاع الماء لكن الحمد لله كملتها
بالاضافة للروتين الاسبوعي لتنظيف البيت عندي على الاقل مرة في الاسبوع نظف البيت لاني طول اليوم اعمل و ادخل احيانا متأخرة للمنزل يا ربي قيس ما نطيب !
لكن يبقالي مشكل لي ما قدرتش نحلو انا نعمل بجهد في عطلة الاسبوع و نقي الدار لكن طول الاسبوع نحس روحي ما نقدر نمس والو يا ربي نطيب و نتعشاو و نروح نتكا نفشل و نثقل ما نقدر نمس والو ! فتتراكم الملابس المتسخة حتى و اذا غسلتها ما نقدرش ننشرها و الماعن يبقاو تاع اليوم على تاع غدوى و هي رايحو حتى يولو جبل و نوض موراها شويا بكري و نغسلهم قبل نا نروح للعمل
حتى البيت ما يتهواش اي لا تفتح النوافذ لأننا نخرجو من الصباح لليل
و حتى النفايات لما نرجع للبيت يكون الزبال راح و تتراكم النفايات والله نكره حياتي لاني نقولو ندوها معانا الصباح في السيارة نرموها هو ما يحبش يقولي تفوح الطونوبيل و احينا والله حتى يدير الدود و نلقاه يدور في ارجاء البيت حتى نعيفو و نكرهو نوض نسيق على سعدي في الليل و نوريلو الدود باش يقدر بصح والله لا حياة لمن تنادي ��
هذو أهم مشاكلي في البيت !