وعليكم السلام ورحمة الله تعالى وبركاته
الله ايسلمك والحمد لله انك بخير تحياتي عزيزتي غزالة
درك نعطيك لغوسات تاع حلوة بنواة كوكو
250غ زبدة
كاس نواة كوكو
كاس نشاء
6ملاعق سكر ناعم
2بيض
1 خمارة
1 فاني
قشور الليمون
ولمي بالفرينة وشكلي الشكلي حبيتيه انا انديرو حربوش ونقص مقروطات ونرمد فالسكر قلاص ولا الطلية
وتقدري تصنعي الدزيريات بنواة كوكو بدلي غبير الحشوة تاع اللوز بنواة كوكو
اما الترتلات
200غ فرينة
100غ زبدة
ملعقتين حليب
سكر
ولمي الكل بماء الزهر
الحشو
ملعقتين زبدة +صفار حبتي بيض +ملعقتينماء الزهر +3ملاعق عسل
جهزي العجينة او ديريها في قوالب كما تاع الدزيريات وهما عراض وقصار شوية عليهم
طيبيهم بلون ابيض
ثم ضعي فيهم انواع المكسرات وهم حب صحاح ماشي مهرسين مثلا حطي اللوز و الجوز و النوادكاجو و البستاش يعني الي حبيت
انا شريت قاع منهم شوي وفي كل مول انحط حبة من كل نوع ثم نسقي بالخليط الي جهزت ونبعد اندخلهم للفرن
حتى ينشف ويصبح عند لون اصفر
وهدا الحلو الي تسمعي ايقولو تاع تستلي
عزيزتي ما نقدرشانكملك تاع المرغريت والله راني مشغولة اسمحيلي ادخلت غير باش انقولك ودرك نخرج وكي نفرغ راني انقولك عليها وعلى تاني واش رايحة انزيد
انتهلاي في روحك وربي ايعاونك
سلام من شقراء