[Rafife09]

المشاركة الأصلية كتبت بواسطة belmani oussama

السلام عليكم أختي
علابالي تعبناك معانا هههههههه
شكرا وبارك الله فيك على النصائح
ولكن عندي طلب اخير نتمنى نكون مش مزعج ليك
كاش مانصائح للفيزياء والكيمياء سمعت يقولو بلي الكيمياء تع الثرمينال صعيبة
وهل تتعلق بالكيمياء تع الثانية ثانوي؟
أما بالنسبة للفيزياء فانا الحمد لله متمكن منها
أرجو الرد في أسرع وقت لأن نصائحك والله أفادتني كثيرا
وبالتوفيق ليك ان شاء الله

سلام عليكم
هدا لا يمثل اي ازعاج على الاطلاق بالعكس انا نفرح كي نقدم حاجة مفيدة لأي انسان محتاجها

و ثم هادي مش مشكلتك وحدك أنا نعرف ياسر من زملائي يقراو تقني منهم اللي يقراو كهرباء و اللي يقراو ميكانيك واللي يقراو مدنية و اللي يقراو هندسة طرائق و لاحظت أنهم كامل يجيبو نقاط مليحة ياسر في الاختصاص تاعهم اللي معاملو7. و هدا يمكنهم من أنهم يجيبو معدلات ممتازم في الباك لولا أنو بعضهم يعاني من الرياضيات و البعض من الفيزياء و البعض الاخر يعاني منهم في 2.
ان شاء الله ما تلقاش مشكلة فيهم و تجيب معدل ممتاز لهدا نقلك راجع الرياضيات مليح وما تخليهاش تكون عائق.

بالنسبة للكيمياء عندك في اول وحدة رح تقراها ان شاء الله لازم تفهم مليح "جدول تقدم التفاعل"
لاحظ أنا قتلك لازم تفهم و ما قلتش لازم تعرف يعني الناس الكل يعرفو يعملو جدول للتقدم وأصلا عليه 0.25 ولكن الأسئلة الأخرى كامل تجاوب عليها انطلاقا من جدول التقدم وما تعملش كالبعض يقوم بملأ خانات الجدول و كأنو يتسلا في صفحة من الجورنال
كيفاه نفهمهالك لازم تفهم لأنو في الباك رح يجيبلك عبارة أول مرة تشوفها تشوفها غير نهار الباك و يقلك بين بللي راهي كدا وباه تبينها لازم تكون فاهم جدول التقدم اللي عملتو
و لكن ساهلة جدا عندك تفاعلات لازم تعرفهم و باينين ولازم تعرف الناقلية هاد الدرس قريناها في السنة 2

الوحدة 2 من الكيمياء لازم تكون فاهم الاحماض و الاسس هادم قريناهم في السنتين 1و 2 و تحتاج الى الكيمياء العضوية اللي قريناه في السنة 2 و درس الناقلية
هنا رح تدرس الاحماض القوية والأمر ساهل خلاص ادا جابلك حمض قوي في الباك غالبا رح يجيبك HCl لازم تقراه مليح
و تدرس ايضا الاحماض الضعيفة و هنا ثاني عندك حوايج باينة الميثانويك و الايثانويك وممكن البروبانويك
وتقرا ثاني الأسس القوية و الضعيفة
المهم أنك تعرف تفرق بين الحمض القوي و الضعيف و من بعد يعلموك غير تعود تحسب في الثوابت
الوحدة هادي ثاني ما فيها والو ساهلة الى ابعد الحدود خاصة ادا فهمت الوحدة اللي فاتت

الوحدة 3 من الكيميا في الجزء الثاني من الكتاب مش غير ساهلة أنا تمنيت لوكان جابوهالنا في الباك. هادي الوحدة تفهم الوحدتين اللي قبلها و عندنا الأعمدة خاصة بالرياضي و التقني و من بعدنا عننا دراسة تفاعل الأستر
هادي كان جابوهالك في الباك تسما عطاولك هاديك ال 3 نقاط اوأكثر هدية كل التمرينات نفس التمرين يبدلو المعطيات وخلاص

يعني الكيمياء اللي رح تقراها كامل العمود الفقري تاعها هوجدول لتقدم لازم تسمع الاستاد يتكلم على تفاعل معين تلقائيا يترسم في دهنك جدول التقدم وما يبقاش مجرد خانات تعمر فيهم هادوك الخانات كامل يمثلو دوال معينة لازم تفهمها.

الفيزيا ثاني ساهلة الى أبعد الحدود

عندك وحدة التحولات النووية أروع و أسهل وحدة واصلا حلوة كي تبدا تقرا تحلالك فيها وتحب تزيد تقرا و نقطتها في الباك مضمونة غير فيها الحسابات ياسر توله لا تغلط وهدا ما كان.

بعدها تجي وحدة الكهرباء ساهلة و العمود الفقري تاعها أنك تفهم و تعرف تفرق بين التوتر الكهربائي و التيار الكهربائي لأن الكثير ما يفهموش و يخلطو وما يعرفوش يفرقو بيناتهم ومن بعد تعود قوانين و أنت تطبق ما تعبلك مخك ما تبقى تخمم ياسر ني والو.

و من بعد كاينة الوحدة اللي يخافو منها الناس كامل هي وحدة الميكانيك بالرغم الي ماهيش صعيبة ولكن اللي يخافو منها لأنها عكس الكهرباء واسعة ياسر مرة يحكيلك على الصاروخ مرة يحكيلك على الطائرة ومرة يحكيلك على الدرة و لكن ادا فهمت الدرس مليح ما كانش مشكل لأنك ادا فهمت الدرس تقدر تتقوى على أي مشكل و تلقالو حل

و هنا العمود الفقري و المفتاح تاع الوحدة هادي هو انك تفهم فعلا وتلمس مفهوم التسارع
و من بعد تفهم القانون الثاني لنيوتن في العوام الماضية قرينا القانونين 1 و 3 هادم من المفروض ساهلين وفهممتهم
القانون 2 لنيوتن لازم تفهم فعلا و مش تطبقو فحسب وتلقاه بللي فعلا هو مفتاح جميع التمرينات كامل يتحلو بقانون واحد هو قانون نيوتن

بعض التلاميد يحصلو في الميكانيك في درس القديفة في هادي الحالة نحاول نفهمك حاجة
القديفة معناها أنك عندك حاجة كرة مثلا وتقدفها الى أعلى بزاوية 30 درجة مثلا رايحة تصعد ومن بعد تهبط
تخيل معايا وما تنساهاش هادي
ما هي القوى المؤثرة على الكرة؟ الجواب الثقل فحسب. البعض يقولو قوة الدفع او ما علاباليش وش يسميوها هاديك القوة اللي رميت بيها الكرة
انتبه احنا ما عطيناش الكرة قوة وانما عطيناها سرعة و لازم تفرق بين القوة و السرعة
الفرق ادا عطيتها قوة فان بامكانك تغيرها في أي وقت تزيد تنقص توقف
أما السرعة ادا عطيت الكرة سرعة خلاص خرجت من يدك و ما تقدرش درك تغير فيها
ان شاء الله نكون قدرت نفهمك

درك تفاهنا كاين قوة واحدة مؤثرة على الكرة هي قوة الثقل ,
ماهي القوة المؤثرة على المحور(OX) ؟ الجواب لاتوجد قوةعلى محور الفواصل
لازم تؤمن بللي ماكانش قوة على محور الفواصل ومنه حسب القانون1 لنيوتن الكرة تتحرك بحركة مستقيمة منتظمة على محور الفواصل
ماهي القوة المؤثرة على المحور(oy) ؟ الجواب قوة وحيدة في جهة واحدة هي قوة الثقل
ومنه حسب القانون2 لنيوتن الحركة على محور التراتيب هي حركة متغيرة بانتظام

ادا فهمت هادي راك فهمت القديفة

المهم بالاك لاحظت كم مرة قلت "لازم تفهم" لأنك ادا فهمت الدرس و ركزت على الحوايج اللي قتلك عليهم الشيء اللي يبقى غير اشتقاقات وتتحول الى رياضيات

بالاك دخلت في التفاصيل ياسر

و لكن هادي الحوايج لازم تعرفها وتركز عليها ورد بالك تغلط فيها

يعني راجع غير الحوايج تاع العامين اللي فاتو : الميكانك, الكهرباء, الكيمياء.
و ما تقراش البرنامج في الصيف خللي في وقتها ومع الأستاد أحسن و اعلم أن الفيزيا والكيميا تاع الباك ساهلين و حلوين

تعلم السرعة خاصة في رسم منحنى في الباك يعطيك 6 منحنيات ترسمهم وكاين تلاميد يحكمو في رسم كل منحنى 40 دقيقة و هو التمرين كامل فيه 40 دقيقة. لانك في الباك تتسابق انت و الوقت و كاين تلاميد ممتازين ولكن يتصدموفي الوقت بشكل كبير.

بالتوفيق. أي حاجة أخرى تحتاجها أنا لهنا. ما ترددش في السؤال.

سلااااام.