[ماريا.م]

السلام عليكم ورحمة الله وبركاته

درت اليوم هاذ القاطو وكي عجبني قلت نشارككم الوصفة
في الحقيقة هو مزيج بين الصابلي والغريبية ،يقرمش لكن
مايقهمش كيما الغريبية

المقادير:
نصف كاس سمن ذايب نديرو في الثلاجة يعاود يجمد
نصف كاس زيت
كاس غير شوية سكر رطب
حبة بيض + 1 صفار
كاس لوز بقشورو محمص ومرحي رقيييق
4 ملاعق فرينة محمصة
ملعقة صغيرة خميرة كيميائية
فرينة

الطريقة :
نخلط السمن والزيت والسكر ملييييح حتى يولي المزيج كريمي أبيض



نضيف باقي المكونات بالترتيب
نضيف الفرينة حتى نتحصل على عجينة متماسكة
أنا شكلتها بطريقتين :
الأولى طبعتها بهاذ المول



والثانية حليتها بالحلال وطبعت أشكال مختلفة



دهنتها ببياض البيض وذرذرت عليها اللوز محمص ومرحي خشييين
طيبتها 15 دقيقة تقريبا على 160 درجة
والشكل الأول كي طابت درتلها معجون ولوز محمص في الوسط

* ممكن تعوضو السمن بالمرغرين طرية،،، واللوز بالكوكاو أو أي مكسرات تحبوها،،، والمربى بنوتيلا أو كراميل
*هاذ القاطو مايجيش حلو بزاف ،،،اللي تحب الحلاوة تدير كاس معمر سكر

نتمنى تجربوها وتعجبكم لأنها فعلا بنييينة وتذوب في الفم

في أمان الله