[سطايفية بكل فخر]

السلام عليكم
اخبرك شيئا اخي والله نقرا في الموضوع ونضحك ليس استهزاء لا سمح الله ولكنك فكرتني في ايامي الاولى في الجامعة كنت ساخطة مثلكم وبلاك اكثر خاصة وانو معطاونيش تخصص مليح رغم انو معدلي طالع لكن كون تشوفني اليوم عاد عندي كلش نورمال لاني والفت الحالة هذي وتاقلمت معاها ومرات نتفكرها ويجيني الضحك لانو الذكريات تكون مليحة مع المعاناة
+
هي مش رايحة تتبدل لهذا منبقاوش غير ساخطين على الوضع ونخليو الوقت يضيع هكاك برك نحاولو حنانستفادو من الشيء لي ينفعنا ونهمشو الاشياء الاخرى او نجعلوها مصدر تسلية باش متقلقناش
مثلا الريسطو اجعلوه وقت مستقطع للتسلية شخصيا كنت نروح مع زملائي ديما ليه ملقري منكلوش مكلتو نتجمعو فيه باش نضحكو ونديفوليو ونديسرو الديسار ديما كاين هههه وزيد مليح للتقريج جميع الاخبار تاع الجامعة تسمعها ثما :d هذي نقطة بعد ماكانت سلبية وتقلق رجعناها في صالحنا باش نرتاحو من ضغط الاساتذة والدراسة ونكونو متابعين احداث الجامعة
مثال اخر تاخرنا وخرجنا الاستاذ مخلناش ندخلو نورمال نروحو للمكتبة مرات نراجعو واش مناش فاهمين عادي مش نقعدو نحرقو في اعصابا لانو خرجنا
مرات الاساتذة يعيطو علينا كنت في بدايايتي نتقلق ونقول علاش راني كبيرة وهوما يعايروني ويعيطو لكن كي والفت رجعتها لصالحي كي يعيط عليا نخرج شابعة ضحك ونقلدو ونديها نهار وانا نقلد فيه هكا باش منحرقش اعصابي والموديل تاعو نحطو بين عينيا باش نبرهنلو بلي كان غالط في كلامو ونقراه وحدي بلا منعتامد عليه ونهار النتائج وحدو يستعرف ويقلك مكش هكا
هذي امثلة بسيطة برك تخليك تقلب السخط لي ياثر على صحتك الى اشياء مفيدة وتستفاد من الجامعة
في النهاية راهي طارتلنا فرصة الكثير من الناس يحلمو بيها
ومش رايحين نحسو بالنعمة هذي غير لما نخرجو منها
نصيحتي لاي طالب جامعي حاول تقرا وحدك وطور معارفك وحدة مش ساهلة علابالي لكن نتعبو شوية
هزوا الخبرة من ليسطاج من البراتيك من الانترنت من اشخاص في مجالاتكم وكلامي هذا ميعنيش تديوها غير قراية
استفادوا ايضا وعيشوا حياتكم وكونو صداقات طوروا شخصياكم ونميوها
والله احلى الايام تقضيوها في الجامعة
حاولوا توفقوا بين الجانبين هكا باش تستفادوا اكثر
كلامي هذا بلاك ميدخلش في روسكم الان
لكن لما تخلصوا الجامعة يومها تتفكوره وتقولو كان عندها الحق
احتراماتي للجميع
وربي يجيب لخير للبلاد