طلب من الادارة تثبتلي الموضوع
بسم الله الرحمن الرحيم..
ااخي اختي اكملي القراءى للاخير ثم احكمي.
انا كتبت عنوان مظلل باش يدخل اكبر عدد من القراء و يقراو فكرتي و يطبقوها او ينقلوها اذا حبوا يعاونو كاش واحد.
* مشروع الخياطة و الات الخياطة
انا راني نتكلم عن خبرة تاع 3 سنوات - من بداية مشغل صغير للخياطة -
قبل ما نبدا المشروع كنت عون مبيعات و ارشاد في احد مكاتب بيع العتاد الصناعي. نبيعو الات للناس لي تحب تبدا مشروعها الخاص. تقريبا كل المشاريع.
من بين المشاريع لي كنا نوفرو الاات تاعها الخياطة. و مان نعظم اصحابها من النساء او بنات في مقتبل العمر. كانو لما يجيو للمكتب كانت تبدوا عليهم ملامح الخوف من المشروع لي كان في معظم الحالات راح تمولو * اوساج * او كناك * المباصية بام عينها - كانو مساكن هايبات و يخافو يهدرو و الادهي و الامر كانوا جاهلات بطريقة الشراء او بداية المشروع و غياب الخبرة في الالات من جهة و من جهة اخرى جشع الموردين و اعوان اونساج و كناك
المهم الدعوة كانت مخلطة و كي سقسيتهم بعض الاسئلة باس نقيم مستوى الوعي تاعهم بالمشروع لقيتهم يحبوا يبداو في اقراب وقت هذي هي الاجابة تاعهم.
و اغلبهم كانو يعرفو يمشيو الالة فقط ما يعرفوش يخدموها او يعرفو الاصلية من المقلدة المهم حالة تحبس الراس و كانوا معظمهم اما معيلات او مطلقات او يتيمات - والله كان القلب ينفطر - كي ينشوفهم و كنت حاب نقولهم اخطيكم من اوساج او كناك لكن للاسف كانوا معايا بعض من الناس لي يلحقوها بالسرعة. نمامين- اكرمكم الله-
علاش كتب المقدمة طويلة بزاف - باش لي يقرا يفهم المعانات تاع هذه الفئلة و اذا قدر يعاونهم او ينصحهم بالتالي:
هنا المفيد:
1- يعتقد البعض ان في هذا المشروع بالظبط لازملو لالات صناعية كبيرة - فكرة غالطة
2- يعتقد انو لازملوا ورشة خاصة - فكرة غالطة
3- يعتقد ان لازملو راس مال كبير - فكرة غالطة
4- يحسب بلي اذا بدا المشروع بالظبط تبدا الرباح تصب عليه- الفكرة الكبيرة لي غالطة
و الكثير من الامثلة:
1 - معنى اونشاج او كناك هي حاضنة مشاريع مصغرة - و ليست الصغيرة-
اونساج لي اقل من 30 سنة * كناك لي اكثر من 30 سمة
المشروع المصغر - عدد الزبائن تاعو في اليوم من 4-6 زبائن
المشروع الصغير عدد الزبائن تاعو من 6-20
تكمن الاجابة في التسمية اذا فهمتوها
* المشروع يبدا مصغر - صغير - متوسط- كبير- موسع
نقولوا علاش: باش صاحب المشروع يتدرب على تسيير المال و العتاد و فهم طبيعة العمل
* نرجعوا لي حاب يبدا مشروع خياطة مصغر واش لازملوا:
1- لازم ينحي الاتكال من راسو - التعوال-
2- لازملوا خبرة في الخياطة - اقل شيئ كيفاش يمشي الة الخياطة
3- لازم تكون عندوا فكرة عن اعطاب الالة و طرق صيانتها
4- تكون عندوا فكرة عن الاقمشة و لوازم الخياطة
النوع المناسب من الاقمشة لكل قطعة من الملابس
5- يعرف يحسب - اساس المشاريع هي حساب التكاليف - لازم يولف روحو يحسب لكلش هذي بقداش - قداش الترنسبور - التريسيتي - الوقت ** قداش نحكم وقت في الخياطة - لانوا الوقت يساوي الطاقة الكهربائية
6- واش لازم من الالات:
اذا تدربت مليح على الة الخياطة
* لازملك الة خياطة منزلية * قديمة ماشي لازم تكون جديدة* اللون تاعها اسود - سنجر سواد-
* علاش هذي باظبط:
هذا النوع من الالات عندو مزايا و خصائص تجهلهل الكثير من الخياطات حتى الخبيرات منهم:
بالرغم من انها تقوم بالخياطة المستقيمة
1- نصف صناعية - تقدر تخيط بها لساعات عدة-
2- تكلفة الصيانة تاعها قليلة
3- قطع الغيار تاعها: 150 دج الى 400 دج اكثر تقدير
4- تمشي بالطاقة الكهربائية او البدال
5- هذا ما كان باقي الالات ماهوش لازمين
6- مازال ما تشريوش - ما تزربوش-
*** علاش ***
اذا لقيت تفاعل في الموضوع راح نكمل لازم تفاعلات و تعليقات باش نكمل
والله كاين مفاجئات - سارة - لوجه الله للناس لي تحب تشترزق في الحلال
لي عجبوا الموضع يبعثلي رسالة صغيرة على الايميل تاعي - تجدون ملف صغير في المرفقات مكتوب في الايميل-
كي تلحقني و لو رسالة صغير نعرف بلي المرسل راهو جدي في الامر و حاب يكمل - و نتحفز انا و نكمل سلسلة المواضع القادمة