[انا هي رزيقة]

اليوم جبتلكم وصفة تارت بالمكسرات و الكرامال الكيفية من النت طبعا مع بعض التحريفات من عندي و التحضير من ايديا و حياة عينييا ما زادها بنة على بنة ..... خخخخخ

لهذ الكيفية لازملكم عجينة بريزي تقدرو تستعملو اي عجينة معتمدة لديكم انا عن نفسي عجينتي فيها 250 غ فرينة 150 غ مرغارين طرية 2 مغارف سكر غلاصي و حبة بيض .بهذ المقادير تجيني عجينة طرية منزيد فيها والو . تشكلي العجينة تاعك في المول و تحطيها تطيب في الفرن على 180 درجة حتى تولي ذهبية متحمريهاش مليح سينو تتكسرلك .

من جهة اخرى تحمصي في الفور كمية من المكسرات انا استعملت جوز و بيستاش (حوالي بول كبير او اكثر ). هي تحطيها في الفرن غير باه تنشف مليح باه تبقى مقرمشة كي تحطيها مع الكرامال . تقدري طبعا تستعملي اي نوع مكسرات فقط اذا استعملتي كاوكاو حمريه اما المكسرات الاخرى خليهم فقط ينشفو في الفرن.

تحطي في كاسرونة 140 غ سكر مع 6 ملاعق كبار ماء و تخليهم يوليو كرامال ذهبي اللون فوق نار هادية مع تحريك الكاسرونة بيديك فقط . كي تتحصلي على اللون المطلوب نحي الكاسرونة من النار و زيدي في الكرامال 7 او 8 ملاعق كبار عسل ثم حركي ثم زيدي المكسرات و حركي ثم زيدي باطة صغيرة كريم سائلة هوبلا ثم ارجعي الكاسرونة على النار و حركي حتى يتجانس الخليط خلطي لمدة حوالي 5 دقائق و زيدي ملعقة كبيرة زبدة و زيدي حركي دقيقتين ثم طفي على الخليط . استناي حولي دقيقتين ثم افرغي الخليط فوق الفون دو تارت لي تكون طابت و بردت و ستفيه مليح بالملعقة .

هذه التارت من المستحسن تاكل غدوة من داك . اما اذ مقدرتيش تصبري ضعيها في الثلاجة لمدة ساعتين و صحتين و عافية

و هذي لاول وحدة ترد تفضلي يا رشيقة ..... خخخخخخخ