شكرا نورانيات على الفكرة . و هاهي وصفة وريدات مقليين و معسلين من قناة سميرة : الوصفة ساهلة جدا جدا ديريها كيما ديري المسمّن دقيق يكون ممتاز و رقيق (أنا زدت معا شوي فرينة) و ملح و تدلكي بزاف بزاف بزاف و من بعد تشكلي كريات مثل نتاع الشخشوخة و تخليهم يرتاحو و من بعد تقرصيهم كيما الشخشوخة و تكسلي مليح العجينة بيدك و من بعد (و هذا الأهم) ترفدي العجينة كامل من جهة وحدة و و تبداي دوري فيها فوق القصعة على شكل وردة و الطرف لراه في يدك دخليه تحت الوردة العجينة و ارفديها بيدك و حطيها تتقلى في الزيت بصح لازم تبقاي ترمي الزيت فوقها باش تطيب مليح و ما تجيكش معجنة .كيما شفتي في الصورة(أنا قللت الزيت خطراها ماكانش عندي بزاف) إضغط هنا لرؤية الصورة بحجمها الطبيعي. في هذه الأثناء تكوني توجدي في العسل : تحبي تشريه واجد أو تخدميه .أنا خدمتو بكاس سكر و كاس ماء و خليتو فوق النار بلا ما حركتو . لما تكلمي كلش سقي الوريدات بالعسل بالمغرف و إذا حبيتي ترشيهم بالكوكاو أو السمسم أو واش تحبي.