بس تشوف هاد البيت طابخ ملوخية..وهاد البيت عم يقلي بيتنجان...وريحة الخيار يعني سلطه...والسمك شارح حالو لحالو...ودبح البطيخة فضيحة..
انا من مدينة كان القمر فيه بالصيف يعني كزدورة على منتزه جمال عبدالناصر...وكل عرس يعني تلبيسه...وكتب الكتاب ملبس..
انا من مدينه كانت امي تقول :ياامي غسلواوجهكم لانكم مابتعرفوا مين بيبوسوا وكنسوا بيتكم مابتعرفوا مين بدوسو.."
وابوي يقول.."جارك اخاك...ازا ماشاف وجك بيشوف قفاك.."
انا من مدينة لما بيندق فيها باب الدار كنا نتحزر بين بعضنا مين وبنقول : ياترى مين اجانا؟
هي نقرة جارتنا سريعة وقصيرة...
هاي دقة عمتي ناعمة وخفيفه...
هاي خبطة ابن الجيران ببوز صباطو ع الباب..
هاي خشخشة المفاتيح..هاد بابا عم ينادي ياالله..ياالله حتى ازا عنا نسوان يتغطوا...
انا من مدينة الحلو الطيب وملبس القضامه والطمرية
مدينة الصابون والعطارة
انا من مدينة التمر الهندي وعرق السوس والقمر الدين
مدينةالحمص والفول والفته والفلافل....
مدينة كل شي بيصير فيه بيستاهل يكون خبريه...ولدت القطه...فتحت الفلة...زهرت الياسمينه...مدينه حتى حبال الغسيل بتحكي قصص وملاقط الغسيل بتنقل رسايل ونشر الغسيل عنا مشان ماينقال عن الست عفشة وشرنه...
بمدينتي مااحلا لمة شعبان وفرحة الاخوات والخلان ...بمدينتي كان بيت الجيران اول باب بندقه لما بنخلص خبز او بدنا ليمونه... اول بيت بنزوره في العيد لناخد اول عيدية
والبيت يلي بيتحمل ولدنتنا وقت ندق على سقاطة وبنهرب..ومنرش على عتبته مي لما بدنا نشطف الحوش او الحارة
بيت الجيران يل بنوقف قدامه لنوصل سكبه او صحن طبيخ من شغل امنا عشان يذوقوه معنا برمضان...في مدينتي كان بعد الافطار برمضان سوق...قناديل وفتاش وطرمس وبليله...
في حارتنا ماكان في قطه جعانه وكلاب الشوارع شبعانه...
في بيتنا كان متل كل بيت في البلد القديمة...
فلة ودالية واضاليه وقرطاسيه......وبكل مطبخ قطرميز مكدوس وتنكة جبنة ونملية فيها الزيت والزعتر...
في مدينتي وبحارات بلدتي القديمة كانت الشتوية غير ياعيني على ايامها كانت الصوبيا ولهبها و كانون النار بيقمر الخبزات وكاسة الشاي وشوي الكستنا...
في مدينتي وبحاراتنا القديمة كانت الغيرة تشتعل بس حد يلطش اختنا او بطلع عليها كانوا كل بنات الحارة اخواتنا وشبابها اخوتنا...
نسيت اخبركم...انه بعد كل مشوار على المنتزة بنروح نتحمم قبل مانطلع على التخت لان الشراشف نظيفه ووجوه المخدات مغيرين ...واذا غلط واحد فينا وفات باواعي الشطحة كانت امي تقيم قيامتنا ...
ياااه على هديك الايام....
اشتقت كتير لكل شي
..
اذا دمعت عينك وانت بتقرأ...
اذن انت من نابلس...
"منقول"