منتديات الجلفة لكل الجزائريين و العرب - عرض مشاركة واحدة - الى مترشحي بكالوريا 2011
عرض مشاركة واحدة
قديم 2010-07-03, 21:09   رقم المشاركة : 32
معلومات العضو
belmani oussama
عضو نشيط
 
إحصائية العضو










افتراضي

اقتباس:
المشاركة الأصلية كتبت بواسطة rafife09 مشاهدة المشاركة
سلام عليكم

امتحان الرياضيات ما يتطلبش تكون عبقري باه تجيب فيه 18 بل يمكن لأي شخص يجتهد يجيب فيه العلامة الكاملة بشرط يكون محظر مليح و يكون نهار الامتحان في نفسية جيدة وفي صحة جيدة و ان شاء الله تكون كدلك. وملاحظة الاختصاص فقط معاملو 7 و الرياضيات والفيزياء معاملاتها 6 بالنسبة ليكم أنتم التقني.*

أولا باه تعمل لاباز درك نقلك على حوايج و الله أعلم ان شاء الله ما تدخلش تعديلات على الحوايج الي رح نقلك عليهم في العام تاعكم.

عندك في امتحان البكالوريا في الرياضيات أكبر نقطة تجي على الدوال و تجي في الموضوعين هاد العام حنا جاتنا عليها 7 نقاط يعني أول حاجة لازم تراجعها من السنة الأولى والسنة الثانية هي الدوال العددية و تراجع النهايات و الاشتقاقية و المماسات و المستقيمات المقاربة و طريقة رسم المنحنى و في السنة 3 رح يزيدو يقريولك الدوال الأسية و اللوغاريتمية سهلة جدا و تقرا الدوال الأصلية أنت اكتفي بمراجعة حوايج العوام اللي فاتو

من المفروض الأستاد كي يقريلك الدوال الأصلية يعطيك الهدف منها و اللي هوحساب المساحات. في تمرين الدوال من المفروض يعطيك سؤال عليها ويكون السؤال احسب مساحة .............من المنحنى طبعا
هادي الدوال الأصلية ما تضيعش وقتك في الصيف و تقراها وحدك هي مش صعيبة و لكن ممكن جدا ما تقدرش تفهمها من غير أستاد

و لكن ممكن جدا في الجزء الثاني من تمرين الدوال يكون حول المتتاليات وفي هادي الحالة يكون التمرين أسهل بياسر من لوكان يجيبلك دالة أصلية يعني نحب نقلك لازم تراجع المتتاليات وحط في بالك بللي ما كانش حاجة أسهل من المتتاليات أسهل درس عندنا في البرنامج كامل.

نروحوللتمرينات الأخرى ممكن جدا يجيبلك تمرين حول الهندسة الفضائية حنا هاد العام جاتنا في الموضوعين و صدقني أكثر تمرين ممكن تضمن فيه العلامة هوتمرين الهندسة الفضائية.
يعني راجع فيها وش قريتي في السنتين الأولى والثانية : التمثيل الوسيطي, معادلة مستقيم في الفضاء , معادلة مستوي , معادلة سطح كرة , وما تنساش تراجع درس المرجح و درس الجداء السلمي...........
هادم تحتاجهم في تمرينات الهندسة الفضائية و في تمارين الأعداد المركبة والتشابه المباشر
تحتاجهم في تعريف مجموعة نقط يعني أنا نشفى معظمها قريناها في السنةالثانية

والأعداد المركبة ما تقراهاش في الصيف قتلك ما تضيعش وقتك في العطلة تقرا دروس السنة 3 وفي الباك تحصل تولي تعاود ترجع لدروس العوام اللي فاتو.
الاعداد المركبة درس ثاني ساهل ساهل ما تتصورش لأي درجة و أصلا حلو كي تفهم وتبدا تحل التمرينات ما تغلبش وما تشبعش منهم خلاص كل ما تحل تمرين تزيد تحلالك وتحب تحل زيد تمرينات أخرى و لكن لازم تكون تعرف مليح وقاري مليح درس الدائرة المثلثية وعارف الزوايا الشهيرة و كامل خواصها و الجداء السلمي ولازم تعرف أهم قواعد الزوايا
اللي قريناهم في السنة الثانية كامل تحتاجهم. بالاضافة الى التحويلات النقطية:الانسحاب, التحاكي, و الدوران اللي قريناه في السنة 1 تحتاجهم ثاني.

التشابه المباشر يعتمد على الأعداد المركبة ,ما فيه والو و يعتمد على التحويلات النقطية و في الباك عادة ما يجيش وحدو تجي معاه الأعداد المركبة و في بعض التمرينات يجيبو معاه المتتاليات و ساعات يحتاج الى الهندسة .

الاحتمالات أيضا ساهلة جدا أساتدة الرياضيات يقولو ما تجيش ياسر لأنو جات مرة واحدة برك في الباك عام 2009 و ما كانش حتى عام اوخر جات فيه و لكن جاتهم ساهلة وجاتهم شجرة الاحتمالات يعني راجع فيها غير وش قريت في السنة 2 و كي تفهم المتغير العشوائي راك مشيت نص الطريق وفي الباك أقراها كاملة و ما تهملهاش لأنو ادا جاك تمرين الاحتمالات ممكن يكون أسهل تمرين و تضمن فيه النقطة.

تبقى كاين دروس أخرى خاصة بقسم الرياضي و التقني هي دروس: القسمة في z , القواسم و المضاعفات, الموافقات بترديد n ,التعداد.............هادي كاين تلاميد ياسر يخافو منها, و من كثر ما التلاميد يقولو راهي صعيبة حتى ما عدتش قادرة نقتنع بللي راي ساهلة بالرغم الي عام كامل التمرين اللي نحاول فيه نحلو صحيح, و قد ما حليت فيها تمرينات قلبي بقا هارب منها وقلت في الباك ما نحلش الموضوع اللي تجي فيه. و لكن لقيتها في الموضوعين وما لقيتش تمرين المتتاليات اللي هو أسهل تمرين و كنت نسنى فيه.
و لكن يوم امتحان الباك برك اقتنعت بللي ساهلة كي راح عليا الحال وبقالي تمرين التعداد ما حليتوش وطلبت من الأستادة اللي تعس عليا ورقة اضافية. راحت باه تجيبلي, هي وصلت للباب و هو دق الجرس شافتلي و قتلي ما كالاه فض الوقت, قلتلها لا ربي يعيشك جيبيلي .
غضتها, جابتلي و ثم حليت تمرين التعداد كامل في هاداك الوقت القياسي و أنا عينيا بالدموع و ايدي ترجف. وكي شفت في التصحيح النمودجي لقيت روحي حليتو صحيح لتما قلت سبحان الله هاد اللي كنت خايفة منو أسهل تمرين و أسهل درس.

على العموم 75 بالميا من برنامج السنة الثالثة متناول في السنة الثانية. درك كي تبدا تقرا في الباك تلاحظ بللي معظم الدروس اللي دكرتهلك في الكتاب المدرسي ما يكتبلكش خلاص الدرس يكتبلك "تدكير" ويفوت للي بعدو ومعظم الأساتدة حسب ما نشوف ما يحبوش يعاودو يقريوهم, يقلك قريتهم العام اللي فات,و ما دخلنيش فيك لوكان قريت على روحك راك فهمت. المهم انت باه ما توقعش في هاد المشكل حاول أنك تتمكن من برنامج السنة 2 و بالاك نكون نسيت حاجة ولكن اعلم أنو برنامج السنة 2 كامل مهم.

ملاحطة: كي تقرا في الصيف ما تروحش لدروس السنة 3 لأنو الوقت تاع الصيف يكفيك فقط باه تراجع الدروس اللي قتلك عليهم.
و ما تظغتش على روحك ومادامك في العطلة ما تخممش في الوقت و حتى لاكان ما كملتش مراجعة مش مشكل أنا ثاني في الصيف ما كملتش المراجعة و من بعد عدت قبل كل درس نعاود نشوف وش قرينا قبل.
لازم تحبس المراجع بشهر على الأقل قبل الدخول المدرسي.

وفي السنة 3 ادا ما قدرتش وحدك استعين بالدروس الخصوصية.

نتمنى نكون دكرت حوايج تفيدك.
نتمنالك النجاح والتوفيق.
سلااااام.


السلام عليكم
بارك الله فيك على هادي النصائح وان شاء الله تجيبي احسن معدل يارب
وماتنسايش كي يخرج الباك قولينل شحال المعدل اوكي؟؟؟ ههههه
المهم شكرا كثير ليك