[انا هي رزيقة]

السلام عليكم فحلاتي الجميلات .اليوم جبتلكم وصفتي المعتمدة في طياب اللوبيا الحمرا لي هي هذي يا ريت تقولولي كيفاه تسموها .

اذا جبتلكم لوبيا حمرا جواز من الاطباق التقليدية في عائلتي

لهذ لجواز نحتاجو طبعا لوبيا حمرا قطع لحم او دجاج (اختياري) بصل ثوم ورقتين رند حبة جزر و حبيتين بطاطا ملح فلفل اكحل كمون (حوالي نصف ملعقة كبيرة) شوية قرفة و فلفل احمر (ممكن ديري فلفل عكري حار اذا كنتم تحبو الحار في الدار) و نصف ملعقة طماطم مصبرة

الان نمر الى الطريقة في طنجرة تحطي بصل مقطع رقيق و سنينات ثوم مهروسين (خلي سنة او اثنين على جيه) و ورقتين رند و لحم مقطع صغير و الزيت و التوابل و الملح و الجزر مقطع بالشكل لي تحبيه و قلي الكل مليح .بعد ميتقلي اللحم مليح و يطلق الماء تاعو زيدي الطماطم المصبرة و زيدي قلي الكل مع زيادة حوالي ملعقتين ماء باه متتحرقش التقلية. ثم مرقي بحوالي نصف لتر ماء. كي تغلي المرقة ارمي فيها الوبيا تاعك اذا راكي طيبيها بالدجاج اما اذ كنتي راكي طيبي باللحم استناي حوالي ربع ساعة الى عشرين دقيقة قبل مترمي اللوبيا و متنسايس تعسي على المرقة تاعك اذا يخصها الماء زيدي ماء مغلي لازم يكون مغلي . كي يطيب اللحم و تشوفي اللوبيا قريب تطيب بصح مزال حاكمة روحها زيدي ارمي البطاطا تاعك مقطعة قطع متوسطة باه متذوبش في المرقة و زيدي معاها سنتين ثوم مهروسين و شوية دبشة او معدونوس . و خلي الكل يطيب لازم اللوبيا تاعك جي تقريبا ذايبة في الفم . كي توصل لهذيك الدرجة طفي عليها و زيدي على وجه المرقة رشة كمون و شوية معدنوس و شهية طيبة .

ملاحظة يمكن طهي العدس و اللوبيا البيضاء بنفس هذه الطريقة فقط اللوبيا البيضاء تحطيها مباشرة بعد ان تغلي المرقة و تكون باتت في الماء ليلة كاملة طبعا اما العدس فتغسليه مليح في ماء ساخن و ترميه في المرقة كي قريب يطيب اللحم اما اذا كان دجاج تقدري ترميه بعد متغلي المرقة مباشرة
ملاحظة ثانية زيادة البطاطا في مرق العدس يساعد على هضم العدس بالنسبة للاشخاص الذين يعانون من عسر في هضم هذه البقوليات و كل البقوليات عموما من المستحسن زيادة خضر معها