السلام عليكم ورحمة الله تعالى وبركاته اليوم جبتلكم طريقتي في تحضير ليتورت قولت منحطهمش كامل ف موضوع واحد اليوم ان شاء الله انحط الطريقة الاولى والمرة الجاية ان شاء الله انحط الطريقة الثانية انخليكم مع الطريقة الاولى لاتورت بالخضر المقادير اربع حبات بصل اربع حبات طرشي اربع حبات طماطم جبن ابيض وشوية حليب ملح وتوابل اما لابات بريزي ديالي ف انا نحضرها كما يلي 250 g فرينة 125 g مارغارين صفار حبة بيض نص فنجان ماء شوية ملح طريقة التحضير اندخلو المارغارين ف الفرينة مليح ثم انضيفو صفار بيضة واندخلوها مليح ثم انضيفو الملح والماء من دون عجن انطمو العجينة وانخلوها ترتاح ف الفريجيدار العجينة ديالي ارتاحت نفتحها بالحلال وانمشيها وانحطها في مول تاع ليتورت بعدما انكون دهنتو بالزيت ونثقبها بالفرشيطة واندخلها اتطيب شوية في هذه الاثناء انروح لتحضير الحشو نقطعو البصل ونقلوه وكذلك الامر بالنسبة للطرشي والطماطم انخلوهم يقطرو من الزيت بعدها نجبدها انفرغ فيها البصل اولا ثم الطرشي ثم الطماطم الجبن الابيض ديالي ذوبتو ف شوية حليب وعملت بيه صوص فرغتو فوق لاتورت ديالي والى الفرن اللي كنت سخنتو شوية من قبل هايليك لاتورت واجدة بالصحة والهناء نتلاقاو ان شاء الله في نوع جديد المرة القادمة باذن الله دعواتكم حبيباتي الغاليات