ملي زدت ونا نجري مع الخدمة
نقرا بالتسلاف وساعات ندير ملمة
نشري كراس والستيلوا ماكاش
ويلا طلبوا الكرطابل ماتفراش
نمشي بلا قهوة بلا حليب
نمرض وعمري ماشفت طبيب
فالشتا طابوا رجليا مالصقيع
وفالصيف تحت الشمس نبيع
قلت معليش نقرا وننفع بلادي
والمزيرية فالجزاير راهي عادي
اديت الباك قلت راني تهنيت
ودخلت للجامعة كيما تمنيت
ساعة لقيت المزيرية زادت وقوات
الاقامة تحسب مقبرة تاع لموات
لاماكلة زينة لا مباتة تفرح
والمعريفة فالبيروات تصيح
اصبرت حتى اديت الديبلوم
وبالكاشي لحمر لقيتوا مختوم
قلت ضمنت خديمة زوينة
ولميمة قاعدة ادير فالطمينة
جاوا الدرك جابولي لوردبال
صدقوني طيحولي قاع المورال
قلت كيفاه من بعد ربعة عامين
هذا ماهو حق ماهو من الدين
علاش ولد الوزير يقرا في لاسويس
يفطر بالكروفات ويتقهوا بالتيسويس
نورمالموا هو يروح يعقب العامين
باش يحس بالمزيرية تاع الجزايرين
علاش ولادكم يدوها بالتمسخير
وحنا الزواليا قتلتونا بالتهمبير
واش من عدل واش من قانون
كرهتونا الجزاير يا جماعة الدانون
احنا هوما ولاد الجزاير مشي نتوما
نهبتو البترول وطلعتوا السوما
كل عام تتمسخروا بينا كيما تحبوا
رديتونا من بعد العز نطلبوا
راحت فرنسا وقعدوا ولادها
طفشوا الشباب وغرسوا فكارها
دمروهم للموت وكلاهم السردين
قولولي وين راهم القاريين
هجروا لفرنسا راحوا للمريكان
اعطاوهم الامل وحلولهم البيبان
وحنا ابرة ومانعرفوش نثقبوها
وبوتفليقة قالك الجزاير نبنوها
باه تبنيها بالشناوة ولا بالطلاين
ما تحلمش الامر راه كالشمس باين
حنا نحبوا بلادنا متسموناش عصاة
اللي عصاة كيما اللي حلبوا البقرات
ومن بعد عطاوها لشيكاغوا فاليل
واللي يخلص الفاتورة غير القليل
لمن راكم توجدوا فالجيوش
بركاكم يا المسائيل ماتكذبوش
تحوسوا تقلبوها بلاد النسوان
الغايطة و القصبة وناس الغيون
الله يهديكم هو اللي يعلم مابينا
نطلبوا منوا يفرحنا ومنكم يهنينا.