[~ حراير ~]

السلام عليكم و رحمة الله تعالى و بركاته
أخواتي بنت خليل و لينة نور مرحبا بكم معانا و مشاركتك يا لينة أضافت الكثير بارك الله فيك و جزاك الله خير و أرجو أن لا تبخلي علينا بهاته المشاركات التي تظيف لنا الكثير و عن نفسي كان لقيتهم في المكتبة راح نشريهم يعني راح نقتدي بأختي مقدسية
مقدسية عزيزتي و حبيبتي بارك الله فيك و ربي يصونك و يسترك دنيا و آخرة

المشاركة الأصلية كتبت بواسطة عمر رضا

سؤالي موجه إليك الأخت أريج المسك
- ماذا كنت تتوقعين عندما طرحت الموضوع أوّل مرّة ؟
- وكيف ترينه الآن ؟
عيدكم مبارك وكل عيد وأنتم بخير

أخي عمر رضا والله أنك فاجئتني بسؤالك لأنه اليوم الصباح لما رحت انخلص في الأنترنت كنت نفكر في هذا الموضوع ... فبكل صراحة بكري لما نروح انخلصها كنت انحسها مجرد كماليات لكن اليوم كنت حارصة عليها بالضبط مثل ما كنت حارصة على المواد الغذائية ... لأنني لقيت ضالتي فيها

راح نبدأ من سؤالك الثاني و انقولك راني كنت انخمم نطلب منك أنت و الشيخ عبد الناصر نحذفو الصفحة الأولى و نعيدو صياغة أول مشاركة باش الي يدخل للركن ما يتخلعش في كلامي الكثير "فأنا كما تعلمون مانعرفش نختصر" و كنت راح انقولكم لازم نحافظو على هذا "الكنز" و هو إجابتي على سؤالك هذا الركن بالنسبة لي هو "كنز" بل أكثر من ذلك أرى أنه نجح نجاحا كبيرا و أقولها و أنا صادقة و نيتي عند الله نجاح همزة وصل كان بفضل الشيخ عبد الناصر و الشيخ عمر .... حتى أنه ثماره ضهرت علي فكل تقويمات شهر أكتوبر كانت ممتازة و ناجحة و هذا بفضل و نعمة من الله العلي القدير و بفضل مجهوداتكم و توجيهاتكم ... ربي يلاقينا في جنته في الفردوس الأعلى و يبارك فيكم و ربي يذكركم بالخير و الهناء اللهم آمين
و الحمد لله اليوم انضمت لينا الأخت الأمنيات و خاصة الأخت مقدسية و الي لها اسهامات كبيرة ومساعدة جد مفيدة و مثمرة في إثراء الركن

أما ماذا كنت أتوقع ... فبكل صراحة أنا لما كتبت الموضوع كنت خايفة جدا أولا عندي 3 متمدرسين فوق رأسي و عندي معلمة تاع السنة الرابعة ناقصة شوية في معاملتها مع التلاميذ و كنت خايفة منها فطرحت الموضوع و لم أكن أبدا أتوقع أي شيئ لأنني ماكانش عندي ثقة في المعلمين و بكل صراحة ....حتى أنني لما طرحت الموضوع كنت متخيلة "تبلعطوني بزوج كلمات و فقط" لكن كان غير ما توقعته و كانت البداية معك الشيخ عمر لما فاجئتني و قتلي مزاجية المعلم كاين منها و عطيتني كيفاش نخلي ابني يشارك في القسم هاذاك انهار عرفت أني لقيت على من أتكل و "نلوح حمولي عليه"
والحمد لله اليوم نقولها وبعلو الصوت الشيخ عبد الناصر و الشيخ عمر رجعولي ثقتي في المعلمين و عرفت بلي المعلمين راهم يعملو بجد و بإخلاص ماهمش قاعدين يتحاكاو كيما راهو شايع عليهم

شفت كيفاش راني قتلك مانعرفش نختصر هههههه أنا دخلت باه انقولكم عيدكم مبروك برك شوف قدش قعدت

أيا عيدكم مبارك و كل عام و أنتم حيين بخير و اللهم تقبل منا و منكم صالح الأعمال
و بصحتكم المشوي و الملفوف و الكرشة