[حياة نور الدين]

المشاركة الأصلية كتبت بواسطة nana47

مرحبا اهلا و سهلا
لا حرمنا الله عطاء جميلات منتطدى الطبخ
دعواتنا متصلة لكن جميعا و لك خاصة سيدتي
استضافة موفقة
اسئلتي لك قبل ان اذهب
كم يأخذ المطبخ من حيز ايامك العادية
اي الاطباق تفضلين اكله و لا تستمتعين باعداده هههههه بمعنى مادابيك يجيك ساجي واجد غير توكلي هنيئا مريئا
اي الكتب تطالعين اكثر
ما هو حلم الطفولة الذي لازت تتنين تحقيقه (ان وجد)
لي عودة ان سنح لي الوقت بهذا
اقامة مممتعة في بيتك
تحياتي

اهلاا اختيب ومتشرفة بك عزيزتي
وشكرا على الدعوة الجميلة

ايييه الوقت اللي نقضيه في المطبخ اطول وقت ههه نوجد قهوة الصباح مع حاجة يشربوا بها بعدها نظف المطبخ ونوجد الغداء وغالبا يكون باقيلي من العشاء نتغداو ونعاود نظف مرة اخرى ومرات نوجد حاجة لقهوة المساء وادا كان كاين ندخلها حتى قهوة العصر نمد الحليب للبنات وانا كل مرة كيفاش مرات نشرب ومرات لاا
ومن ثم نوجد العشا ونظف ورائي حتى نتعشاو ونظف ونودع مطبخي هههه
ومرات نحب نفتل مثلا بركوكس او نقي ثوم او نوجد ليمون او جلبانة وهنا نقضي اطول وقت

الطبق اللي نستمتع باكله ونحبه ونتمنى ناكلوا من برة او واجد هو البيتزا ههه

الكتب صراحة كنت نطالع كي كانت عندي دعاء برك ودوكا مراهمش يخلوني نقرا بسلامتهم ههه كنت نقرا الروايات والقصص باللغتين العربية والفرنسة ومرات كتب شعر وفقه واكيد كتب الطبخ

في الطفولة كان يراودني حلمين حلم مسكن واسع لانه من الصغر وانا نسكن في بيت ضيق من غرفة ومطبخ حتى كبرنا وكنا راح نتزوجوا فرج علينا ربي بسكن وكي تزوجت راني متمنية نفس الامنية
والحلم الثاني انه يكون عندي مشروع خاص بي من قبل كنت حابة مشروع بقرايتي يعني مخبر او مؤسسة مصغرة صناعية حسب شهادتي والان حابة مطعم متالق ههه ويبقاو احلام في انتظار تحقيقها

نتمنى اني وفقت في الاجابة