[انا هي رزيقة]

السلام عليكم هذه هي مشاركتي المتواضعة في هذه المسابقة الجميلة التي اشكر جزيل الشكر المشرفات على فكرتها جازاكن الله الف خير اخواتي في هذ الشهر الكريم
هي اطباق بسيطة بساطتي و غير مكلفة لا للجيب و لا للجهد و الاهم الاهم انها هي الاطباق نفسها التي احضرها لعائلتي التي تحبذ الاكل البسيط فقط
درت طاجين كفتة محشي بيض بصوص زيتون ايفلي و رافقته بكريات البطاطا رمدتها في شابلور و قليتها . و التحلية فلان فانيليا بكرامال منزلي .بما ان المشرفات قالو وصفات دون تكليف سمعت كلامهم ... خخخ فقدمت مااقدمه في بيتي لعائلتي و حظ موفق للجميع .


فيما يخص الطاجين درت بصلة كبيرة و سنينات ثوم في الروبو و طحنت كلشي ثم حطيت نص الخليط في المرميطة تاعي مع ورقتين رند و عيدان معدنوس مقطعين و ملح و كركم و فلفل اكحل و قرفة و ملعقتين زيت و نصف ملعقة سمن و حبتين زرودية مقطعين رقاق و قليت الكل مليح ثم مرقت بحوالي كاسين ماء مغلي و زدت فوقهم كمشة زيتون ايفلي

من جهة اخرى اخذت الكفتة تاعي داويتها بنصف خليط البصل و الثوم لي بقالي زدت نصف بيضة مضروبة و ملح و فلفل اكحل و معدنوس و قرفة و ملعقة شابلور و خلطت الكل مليح و زدت غليت بيضتين و قطعت كل وحدة على اربعة و شكلت بولات بالشكل الظاهر في الصوورة و رميتهم في الصوص
و في اثناء طهي الطاجين كنت غليت حبة بطاطا و زدت عليها البيض لي بقالي من البولات و شوية معدنوس و نصف خليط البيضة لي هدرت عليه الفوق و شكلت كريات صغيورين و مرمدتهم في الشابلور و قليتهم في زيت غزير و زينت بهم الطبق










التّحليـــة

بالنسبة للتحلية اظن ان الصور واضحة درت فلان فانيلا عادي و حضرت لي رامكان تاعي و حطيت في كل واحد ملعقة كبيرة كرامال تحضير منزلي و فرغت عليهم الفلان و هو سخون























التّحدي الثّــــاني ...~

السلام عليكم صح فطوركم حبيباتي هذه مشاركتي في تحدي الاسبوع الثاني الخاصة بالسلطة و المقبلات

هذي صورة جماعية للسلطة والمقبلات

اولا السلطة المشكلة

فيها خضار مشكلة من مسيدوان خضر درت فيها جلبانة و بطاطس و جزر خلطت فيهم شوية فقط مايوناز و عصرة ليمون و حشيش معدنوس و فيها ارز مخلط مع شوية طون و طماطم مقطعة قطع صغيرة و مايوناز و عصرة ليمون

و البيض ميموزا فيه صفار بيض مخلط مع شوية مايوناز و بصل مقطع رقيق و معدنوس و عصرة ليمون

وحضرت ايضا فيرين السلطة فيهم ايضا روز و مسيدوان خضر و جزر

و هذو ميني كوكا بالعجينة المورقة محشيين بشكشوكة من الفلفلة و البصل و الطوماطيش

لاحظي معي اختي من الضروري ان تشكلي الكوكا بهذا الشكل

و درتا ايضا نوغاتس دجاج قطعت دجاج شرائح و خليتهم نص نهار في خليط من الحليب وملح و حشيش معدنوس و رشة كمون و رشة ثوم بودرة وعصرة ليمون و فلفل اكحل و شوية موطارد و شوية هريسة ثم رمدتهم مباشرة في خليط من الشابلور و الفرينة و الفلفل الاحمر و قليتهم في زيت غزير و رافقتهم بصوص بيضاء مكونة من جبن و حليب

درت ايضا فريت مكعبات خلطتها هكذاك سخونة بمعنوس و بصل مقطع رقيق

و نسيت مصورتش في المجموعة كروكات الارز فيها ارز مطبوخ مليح مخلط مع فرماج ابيض و بيضة و باتي بيتزا حار و معدنوس وشوية من خضار الماسيدوان و مرمدتهم في شابلور و مقليين ايضا في زيت عزير