السلام عليكم اخواتي اليوم جبتلكم المطلوعة المورقة او المدهونة كيما نسموها في الاوراس وهي لذيذة جدا تناسب الشوربات يعني في مكان المطلوع العادي وتناسب اللبن خاصة كي تعود سخونة يا سلام على البنة بدون اطالة هيا مع طريقة التحضير تعجنو العجين عادي الطريقة تاعي سميد نوعية جيدة + شوي فرينة +ملح+خميرة+شوية سكر باش يسرع مفعول الخميرة ونبلها بالماء ونعجن مليح وندلك نحطها تخمر كي يتضاعف حجمها نعاود ندلكها بقطعة مرقرين وندخلها فيها ما صورتش هاذ المرحلة نقسم العجينة الى قرصات نخلوهم يرتاحو شوي ونقرصهم وندهن القرصة بشوي مرقرين بحيث تتغطى كامل ونرولي حربوش ونقفل مليح باش ما تخرجش المرقرين نعاود نلمها على شكل قرصة بالضغط على الجوانب والتكوير كيما وضحت بالاسهم حتان نتحصلو على قرصة نخليها ترتاح 3دقايق ونعاود نقرصها شوفو كيفاه ريحت باش تعطيلنا الطوع نعاودو نحلوها وندهنها بالمرقرين ونروليها حربوش ونقفلو مليح ونعاود نضغط على الجوانب ونشكل قرصة يعني راني عاودت المرحلة السابقة نخلوها ترتاح 3دقايق ونعاود نفس الخطوات السابقة الموضحة بالصور يتسمى دهنتها 3مرات نخلي القرصة ترتاح 3 دقايق ونحلها او نقرصها نخليها تخمر نسيت نصور هاذ المرحلة ونطيبها وهاهي واجدة تجي بنينة على المطلوع العادي ان شاء الله شرحي مفهوم انتظر ردودكن اذا عجبتكم دعوة خير تكفيني