مساء الخير فراشات
فكرة اليوم مستوحاة من
مشروع 120 تاع أم تينة وقفةرمضان تاع فراشات العمر
الفكرة هي مزيج من الفكرتين............ تصبح فكرة ثااااالثة وهي:
أنو مع اقتراب الشهر الفضيل تجمعي قفةرمضان تفرحي بيها عائلة فقيرة
1.الي تقدر تتكفل بقفة رمضان في وقت واحد يعني تشري كل شيء مع بعض في نفس اليوم وتتبرع به لعائلة فقيرة. وربي يباركلها في مالها ان شاء الله
2.الي ما تقدرش مع غلاء أسعار المواد الغذائية تقوم بالفكرة هاذي.... وهي : أنها تبدأ من اليوم تجيب قفة
وتخبيها بعيدة عن الأنظار وتحط فيها أي شيء من الي عندها في البيت:
قرعة زيت، باطة طماطم، كيلو سكر، باطة قهوة، باطة لحظة، كيلو فرينة، دشيشة، باطة اتاي، صابون، دقيق، خل......... الخ
وكل يوم حطي حاجة حتان يلحق عليك رمضان تلقاي القفة تعمرت بلا ما تفيقي. هذاك الوقت تقدري تزيدي حوايج أخرى:
بيض، لحم، دجاج، خضر.........الخ
ورايحة تفرحي بيها عائلة محتاجة. واذا ماتعرفيش الفقراء في المنطقة الي ساكنة فيها .... اديها للجامع لخاتش الامام يعرف الفقراء والمحتاجين وهو يتصرف بيها
وربي يجازيك الحسنة بأضعافها.