[غزالة الصّحراء]

المشاركة الأصلية كتبت بواسطة القبايلية

استسمح جميع الأخوات و أختي زينب صاحبة الفكرة

قدمت مشاركتي في أحسن طبق تقليدي و لكن لللأسف الصور لم تظهر و أنا جيت نصحح الخطأ و لسوء حظي محيت المشاركة كامل

لذلك سأعيد طرح مشاركتي مرة ثانية

طبقي هو طبق تقليدي قبائلي تشتهر به مدينة القبائل بصفة خاصة و الوسط الجزائري و الجزائر عامة ألا و هو طبق الكسكس

نظرا لصعوبة تضاريس منطقة القبائل و مناخها كانت تعتبر منطقة ريفية فقيرة يظهر هذا جليا في اللباس التقليدي للمنطقة و كذا في تراث مطبخه، المنطقة كانت رعوية و فلاحية و تتميز باشجار الزيتون ، لذ نجد أن المطبخ القبائلي القديم و الحالي يعتمد بصورة كبيرة على الحبوب الجافة، و الخضر و زيت الزيتون.

طبق الكسكس هو موسوعة في حد ذاته يختلف من منطقة لمنطقة و من دشرة لدشرة و من بيت لآخر، كل عائلة تتفنن في طهيه و يختلف إعداده حسب الفصول و حسب المواسم

أنا اليوم فضلت نوع من الكسكس بالحبوب الجافة يقدم في فصل الشتاء نظرا لقيمته الغذائية العالية ، و نظرا لتوفر الخضر اللازمة لإعداده، الطبق تقليدي بحت و لكن في وقتنا الحالي غيرا فيه بعض الأمور و أنا نحاول نقدمو بطريقة تقليدية و إذا تعذر ذلك رايحة نمد الطريقة التقليدية في الشرح

اللوازم :

لحم، أو دجاج حسب المتوفر نقدرو نقدموه بدون لحم (قديما كانو يطيبوه بالقديد اللي هو اللحم الناشف)

الحبوب المتوفرة أنا استعملت (الحمص، العدس، اللوبيا ذات العين السوداء، الفول اليابس) نفختهم في الماء من قبل

نقدرو نستعملو الجلبانة، اللوبيا البيضا اي حبوب موجودة وخلاص

بالنسبة للخضر استعملت (الخرشف، الجزر، اللفت، القرعة، البصل) و نقدرو نستعملو كل ما هو موجود، كرافس، بسباس، كرمب...

التوابل: فلفل اسود و فلفل عكري هاذا واش كان متوفر في القديم في المنطقة ، و الفلفل الأحمر الناشف و أنا زدت طماطم مصبرة و زمان كانو يستعملو طماطم ناشفة يقطعوها و يحطوها للشمس تنشف بعدها يخبوها

و الكسكس بطبيعة الحال و زيت الزيتون إجباري في الوصفة

و الصور ستوضح ذلك

أول شي نقو الخرشف و نحطوه يغلي في الماء و القارص، نقطعو البصلة رقيقة و نقو الخضر و نقطعوهم كامل

نحطو اللحم و الزيت و البصل و الملح و التوابل نقلي مليح مليح و بعدها نضيف طماطم مصبرة و جميع الحبوب و نقص للنار و نخلي كل شي يتقلى بالعقل و بعدها نمرق بالماء المغلي و نغلق القدرة

في هاذ الوقت نشمخ الكسكس و نفورو على المرقة ، بطريقة عادية و نراقب اللحم غير يبدا يدخلو طياب نزيد عليه اللفت و الجزر و الفلفل الأحمر و نخليه يطيب و نعاود نفور الكسكس عليه مرة ثانية

بعدها نضيف الخرشف المقطر مليح، و القرعة و نخلي كل شي يطيب على نار قليلة

الكسكس بعد ما يتفور ندهنوه بزيت الزيتون و نحطوه جانبا

التقديم كل واحد حر في طريقة تقديمه و لكن نعطيلكم الطريقة التقليدية (يتسقى في قصعة كبيرة و يتلايمو عليه جميع أفراد العايلة)، و شهية طيبة تاكلوه بالصحة

نتمنى جربوه لأنه حقا يستحق التجربة

نخليكم مع الصور

يسلموا ايديك غاليتي روح مراد على هذا الطّبق الشّهي وعلى طريقتك الرّائعة في تحضيره.
ملاحظة أنا أحضّره بنفس الطّريقة فقط لا أضيف ما ورد في المرحلة الثّانيّة التّي ذكرتيهاهي إضافة الخضر (الخرشف، الجزر، اللفت، القرعة، البصل) و نقدرو نستعملو كل ما هو موجود، كرافس، بسباس، كرمب..قد أتّبع هذه الطّريقة مرّة أخرى ألف شكر وتحيّة. .