السلام يا أخواتي الفاضلات انا شخصيا شحال من مرة قريب يكلخلي مول السردين خاصة اذا كنت مزروبة نولي للدار و هو يعيط أيا السردييييييييييييييييييين أنتي تفرحي و تقولي ياااااااا دخلت السردينة و تشريها و طيبيها كي تبداي تاكلي تقولي ياااااا بصح ماشي بنينة واقيل ما عرفتش نطيّبها لا ماشي أنتي لي ما عرفتيش طيبيها و انما هي أصلا ماشي سردين و إنّما لاتشا لذلك حبيت نبّهكم و خاصة انو في أفريل تدخل اللاتشا ما تكونش السردينة بزاف و اذا كانت ما تلحقش لينا يشروها اصحاب المطاعم في البحر هاذي صور توريلك الفرق بين السردينة و اللاتشا و الاونشوا شوفو مليح النقاط السوداء لي تجي في السردينة و ماكاش في اللاتشا و شوفو مليح الخط الأصفر لي يجي في اللاتشا و ما يجيش في السردينة و هاذي هي الأونشوا راهي تجي طوييييييييلة و رقيييييييييييييقة و نصائحي باش تشري السردين : 1- ردي بالك تشريه بلا راس 2- السردينة لازم تكون حاكمة روحها ماشي مهروسة كيما بعض المرات تبان جازت فالميكسور 3- لازم في عينيها مايكونش النقاطي تاع الدم والا ما تشريهاش 4- الريحة تاعها لازم تفكرك في البحر ماشي في المجاري المائية حاشاكم و حاشا قدركم 5- كل ما كانت السردينة صغيرة كل ما كانت بنينة 6- السردينة موجودة في الصيف من الأفضل ما تشروهاش قبل و الا راكم تشجعو في الصيادين يصيدوها و هي في موسم التزاوج 7- كاين بزاف لي ماعلابالهمش انو السردينة الصغيرة تنتكل بيها بشوكها، فقط الرأس و الزعانف و الذيل لي ما ينتكلوش، أمّا النخاغ الشوكي ينتكل امضغي مليح فقك فيه الكثير من البروتينات 8- حاولي ما تشريش السردين بعد الساعة 10 خاطش هذاك يكون شبع شمس و رش تاع الماء من البائع باش يبقى يبان جديد لكم الدم تاعو يقدر يخسر و يضر الصحة تاعك 9- السردين اذا شريتيه اليوم طيبيه اليوم ضروري والا اذا خليتيه في الثلاّجة راح يسبب لك تسمم من الأحسن طيبيه مثلا شطيطحة و خبيه في الثلاجة لكن ماشي طايب لا يوضع في الثلاجة و هاذي شطيطحة سردين من عندي لي حابة تجربها اهلا وسهلا https://www.djelfa.info/vb/showthread.php?t=1999610