السلام عليكم و رحمة الله تعالى و بركاته أخواتي الكريمات رمضان كريم و بهاد المناسبة كاين عائلات بزاف يستهلكو خبز الرخسيس او الرخساس او خبز نص خمير او الفطير كل منطقة واش تسميه كيما في عائلتي يحبو ياكلوه غي هو رمضان و عليه كان لازم عليا نلقى طريقة باش ما يضيعليش الخبز و ما يترماش و نديره بمقادير مضبوطة يعني هاد المقادير الي رايحة نحطهم ليكم يعطوك زوج خبزات متوسطات و انتي ديري و متطلبات عائلتك كانت كبيرة او صغيرة ضاعفي المكونات و ادا حبيتي خبيزة ديري نصف المقادير و هاكذا المقادير 2 كيلات سميد رقيق (المكيال استعملي هاد الكأس الي نشربو بيه الحليب كيلي بيه الدقيق ) مغرف كبيرة سكر مغيرفة قهيوة خميرة الخبز مغيرفة قهوة ممسوحة ملح فنجان قهوة زيت ماء دافيء الطريقة اولا خلطي النواشف مع بعض من سميد و خميرة و سكر و ملح و من بعد ضيفي الزيت و خلطي مليح حتى يدخل الزيت كامل في السميد و من بعد ضيفي الماء الدافيء غي بشوية و خلطي احرصي ما تجريش العجينة و بداي شغل تقطعي فيها و من بعد لميها مليح و ضعيها في ساشي على طريقة اختنا الورهرانية ربي يحفظها غطيها و خليها بجيهة حوالي عشر دقايق و من بعد زيدي قطعهيا و عجنيها شوية من غير ما تضيفي الماء و عاودي رجعيها للساشي و خليها تريح حوالي عشر دقايق حتى ربع ساعة و من يعد ذلك حكمي العجينة زيدي عجينها شوية و قسميها الى قرصتين و قرصيهم رقاق بالاستعانة بالرولو من غير ما تستعملي لا سميد لا فرينة راهي تجيك ساهلة في الحلان غطي الخبيزات و خليهم يزيدو ريحو شوية وقت الي تسخني الطاجين ديالك او المقلاة طيبيهم على نار ذليلة بزاف و ديجا ما يطولوش في الطياب الله يبارك خفيف ظريف استيس ممكن تعرفوه ادا الاخت تخافي كي ترمي الخبيزة في الطاجين استعيني بورق الطهي قرصي فوقه الخبيزة من البداية ما تنسايش تثقبي الخبيزة بالفرشيطة كي تحطيها فوق الطاجين .................................................. ............................... تفضلن الصور توضح أكثر و ان شاء الله تعجبكم الطريقة . و تجربوها و ردولي الخبر هنايا ولا في الكوزينة في أمان الله