تطبيقي اليوم
نضت ليوم على 5 نتاع الصباح
صليت و قريت القران و الاذكار
و توجهت للكوزينة
طيبت الفطور اللي كان قهوة /حليب / كرواسون / مسكوتة
و من بعد غسلت المواعن و فطرت
سيقت الكوزينة و من بعد توجهت لباقي البيت
رتبتو من الطابق الارضي للطابق الثاني " الطابق الثالث رتبتو لبارح "
و من بعد بديت نطبق في البرنامج
رحت على الصالون الصغير
نضفتو
غسلت الحيوط و مسحت لي مابل و غسلت الاواني اللي فيه " مزينين بيهم "
و مسحت التحف اللي فيه من فازات الى كادرات الى تحف صغيرة
مسحت لي فوتاي و نفضت الزربية مليح " ما غسلتهاش لاني غير كيف غسلتها بقات نضيفة "
و من بعد غسلت الشبابيك من برا و الداخل و مسحت الزجاج و اللوح
مسحت الثريات و السقف
ومن بعد نحيت لي كاش ريدو باه نغسلهم
و من بعد خرجت كامل القش "ماعدا البيفي "
و سيقت الصالة بالنضاف والصابون و الجافيل
و من مسحت الارضية بالصانيبو " عطر الخزامة "
و من بعد رجعت كامل الحوايج و رتبتهم
و عطرتو و خرجت
و توجهت للكوزينة
غسلت المواعن اللي فطرو فيهم
و من بعد درت الغدا
اللي كان شوربة عدس / مطلوع/ سلاطة /فلفل
دوزنت المرقة و حطيت الفلفل على الطاجين
و درت الطماطم تتقلا
و من بعد غسلت السلاطة و في هذا الوقت كمل طياب الفلفل نقيتو و هرستو مليح و اضفتو على الطماطم
و من بعد عجنت المطلوع و خليتو يختمر
و خبزاتو ماما
توجهت للصالة الكبيرة " في الطابق الثاني "
نفضت لي فوتاي و نضفت التحف اللي فيها و الاواني تاع النحاس
و من بعد غسلت الزرابي اللي فيها
مسحت لي مابل اللي فيها و الثريات في 3
و مست السقف بسرفيات
و غسلت الحيوط
و سيقتها و عطرتها وخرجت
هبطت للطابق الارضي
درت العصير " عصير الليمون "
و خدمت السلاطة و من بعد حطيتلهم تغدينا
و غسلت المواعن و مسحت الارضية
و سكرت الكوزينة
صليت الظهر و قريت شوي قران
و هنا ينتهي شغلي لليوم
يبقالي غير العشا و المواعن
بالتوفيق للجميع