انا نشوف أنو باش تكون علاقة الكنة والحماة جيدة لازم كل وحدة فيهم تحط نفسها في بلاصة الأخرى، يعني الكنة تتخيل نفسها حماة مستقبلية وكيفاش حابة تعاملها كنتها الي هداتها أغلى حاجة عندها والي هو إبنها الي تعبت عليه في الحمل والولادة والتربية وكبراتو ورجعاتو راجل يعتمد عليه، كذلك الكنة تقدر تحط أمها مكان حماتها وكيفاش تتمنى زوجة اخيها تعامل أمها، لما تتخيل الكنة الأمر هذا كامل رايحة تعذر حماتها وتحس بإحساسها وأي شيء تقدمو ليها راح تعتبرو قليل في حقها.
وبالنسبة للحماة كذلك تحاول تتذكر نفسها لما كانت كنة كيفاش كانت تحس وواش كانت تحب وكيفاش كانت تتمنى حياتها واستقلاليتها مع زوجها وأنها ما تحب حتى واحد يتدخل في حياتها وغيرها، كيما تقدر تحط بنتها كذلك في مكان الكنة والي تتمناه لبنتها تتمناه لبنت الناس، رايحة هي ثاني تعذر الكنة وتحس بيها وبالتالي تخليلها هامش من الحرية في تدبير حياتها وشؤونها.
ربي يحفظ أزواجنا و أمهاتنا وحمواتنا ويقدرنا على طاعتهم وتقديرهم ان شاء الله