البسملة1
مساء الخير عليكم بطبوطاتي 
على بالي وعدتكم نكتبلكم وصفة بسبوسة البيسكوي بصح والله ماقدرت نزيد نأجل وصفة مادلان الليمون وجوز الهند اللي طلبتوها مني من قبل عاودتها اليوم باش نزيد نتأكد من أن المقادير مضبوطة .... تعرفوني مانحطش وصفة حتان نتاكد منها مليح
هذي الوصفة صدقوني يا بنات "أروع مادلان كليتو في حياتي " هكذا قالو أخواتي كي ذاقوها ... لا زم بعد أول قضمة منو تسمعو "مممممممم"
راهم يأكدوا عليا قالولي ماتزيدي ديريلنا حتى وصفة أخرى للمادلان من غير هذي لأنو عايلتي تموت على الليمون وجوز الهند 
ريحة الليمون وطعمو وحماضتو باينين بوضوح في هذا المادلان وخفيف يهبل وبنين مممممممم
رايحين تندمو إذا ماجربتوهش ونحاسبكم بالوحدة عليه لازم جربوه والله وصفة تستاهل وخاصة أنهامسروقة 
نبدأ الوصفة على بركة الله .... هيا أكتبوا المقادير واش تشوفوا فيا :
مادلان بالليمون وجوز الهند
أنا عملت نصف المقادير وتحصلت على 12 حبة مادلان :
4بيضات
كاس وربع سكر
كاس زيت ( ماتعمروش الكاس نقصو منو شوية أنا نقصت ربع )
كاس كبير وربع جوز الهند
مبشور وعصير ليمونةكبيرة او زوج صغار ( انا في نصف الكمية استعملت ليمونة صغيرة
م ص فاني
رشة ملح
2خميرة
كاس كبير ونصف فرينة
للتزيين: معجون مشمش أو جولي ( هذو لازمين في الوصفة ماشي اختياري )
نضرب البيض مع السكر والفاني جيدا ثم نضيف مبشور و عصير الليمون والزيت ونخلط ثم نضيف المكونات الجافة ونخلط.
كي يطلع يعني بعد حوالي 10-15د انا نقصلو حوالي 140° ونخليه يطيب مليح من داخل ويتحمر من تحت ومن فوق .
كي يطيب وهو سخون شوية ندهنو بمعجون مشمش أنا خلطت نص بنص معجون مشمش مع لاجولي جا روعة الطعم كلو على بعضو
ملاحظة : أول مرة درتو جا خفيف بزاف على هذي قلتلكم في المقادير استعملو للفرينة وجوز الهند كاس كبير باش مايجيش خفيف بزاف ويجي شكلو مليح هذي المرة كي عاودو كيلت بكاس كبير جا مليح برك ماشي خفيف بزاف بزاف
أترككم مع الصور :
وضرك ياويلكم نحكم وحدة دور هنا في المنتدى وهي ماجرباتوش ......... مباشرة تلقى عندها بطاقة حمراء لا صفراء لا والو 
تحياتي .............. أنا لهلوبة