ألا ليت الزمن يرجع .. ورا والا الليالي تدور
ويرجع وقتنا الأول .. وننعم في بساطتنا
زمان أول أحس إنه .. زمانٍ فيه صدق شعور
نحب ونخلص النية .. و تجمعنا محبتنا
زمن ما فيه لا غيبة .. ولا حتى نفاق و زور
ياليته بس لو يرجع .. و نسترجع طفولتنا
صغار قلوبنا بيضا .. نعيش بعالمٍ محصور
ولا نعرف أبد أغراب .. ما غير عيال حارتنا
صحيح صغار في التفكير .. لكن ما علينا قصور
نخطط نكسر اللعبة .. و تسعدنا شقاوتنا
نروح المدرسة بدري .. و نضحك داخل الطابور
نحاول نزعج العالم .. في روحتنا وجيتنا
وعشان نأخر الحصة .. نخبي علبة الطبشور
نشاغب بس في الآخر.. تميزنا براءتنا
نحب الضحك والهيصة .. نحب ننط فوق السور
نفرفش ليه ما نفرفش .. ما دام الضحك عادتنا
ولكن دارت الأيام .. و بان الخافي المستور
وصار الهم متعلي .. على قمة سعادتنا
كبرنا و صارت الدنيا .. تصف أحزاننا بالدور
وتهدينا الألم والهم .. غصب عن عين رغبتنا
تعبنا من بلاوينا .. أحد ضايق و احد مقهور
ولكن غارق بهمه .. و في الآخر تشتتنــا
و انا ما اقول غير إنه .. ألا ليت الزمان يدور
ويرجع للورا فترة .. نعدل وضع عيشتنا