الروز مع الحوت انا هي رزيقة
من الاحسن تستعملي حوت كبير شوي انا استمعلت ميرلون و روجي بعد ما تنقيهم تبليهم بثوم و معدنوس و عصرة ليمون و كمون و فلفل اكحل و ملح و فلفل احمر و هريسة لمحبي الحار و شوية زيت زيتون خليه يتشرب مليح من التتبيلة ثم حطيه في بلا مفرش ببصلة صغيرة و فلفلة ديري عليهم رشة صغيرة ملح و فلفل اكحل ثم ستفي الحوت تاعك من فوق و زيدي فوقو شرائح الطماطم و ورقيتن رند و غطيه بورق الالومنيوم و دخليه للفور لمدة 20 دقيقة على الاكثر بعدها نحيلو الورق باه يتحمر . بالنسبة للروز هو روز بالخضار تقلي حبة بصل صغيرة مع سنتين ثوم مع حبة زرودية مقطعة مربعات صغيرة مع ورقة رند و شوية كمون (لازم الكمون يعطي بنة للرز) و فلفل اكحل و شوية قرفة و ملح و فلفل احمر و شوية كركم و مغرفة صغيرة طماطم مصبرة تقلي الكل مليح ثم مرقيهم قيس كلتين و نصف من الماء لكيلة الروز لي رايحة تستعمليها ثم زيدي شوية زيتون مقطع شرائح او جلبانة او الاثنين انتي و ذوقك. تحضري كيلة من الروز ايتوفي (مفور) و تغسليه مليح عدة مرات باه تنحيلو النشا ثم ترميه في لاصوص و تنقصي للنار يطيب بعقلو و عسي عليه مره على مره خلطيه بلعقل و عسي الماء اذا نقص زيدي ماء سخون مشي بارد و ذوقيه على الملح و خليه حتى يشرب كامل هذيك لاصوص و شهية طيبة .
إضغط هنا لرؤية الصورة بحجمها الطبيعي.
