البسملة1 اهلا بالجميع كنت شفت من قبل موضوع العضوة ام فراس واصيل لموضوعها لبيني في المقلة نقلها يعطيك الصحة اختي ومشكورة على الوصفة الرائعة وكي شفت موضوعها عجبتني الفكرة نتاع لبيني بالياؤورت الطبيعي ويتعجنو بالماء البارد ويخمرو في مكان بارد جاتني غريبة شوي جربت الوصفة وكانت النتيجة رائعة طبعا وليت ندير وصفتها جاتني طريقة سهلة حرفت فيها ماشي في الوصفة بدلت الياؤورت فقط كل منديرهم نغير في نوع الياؤورت درتهم بياؤورت ذوق فراز وذوق خوخ وذوق موز يعني وليت نغير في الياؤورت كل مانجي نديرهم لقيت النتيجة اروع وبما انو موضوع ام فراس واصيل مفيهش الصور كي طبقتهم من قبل وكان اول تطبيق دعمت موضوعها بالصور وايضا الاخت ام ماجد ربي يحفظها صورت المراحل وزادت دعمت موضوعها وطبعا عضوات قسم واش طيبتي اليوم طبقوهم وكانت النتيجة رائعة واكيد شكروهم كامل وليوم عاودت درتهم و صورت المراحل مليح منطولش عليكم بزاف ونخليكم مع الصور وصور تطبيق العضوات الوصفة من موضوع ام فراس واصيل المقادير : باط ياؤورت طبيعي + مغرف سكر عادي +2مغارف زيت + مغرف خميرة انتاع الخبز + فرينة كيلة تقريبا بول نتاع شربة و تلميها بالماء البارد وتحطيها تخمر تريح في مكان بارد لاشة ربع ساعة كي تخمر تحليها بالحلال ترشي الفرينة وتحلي باش ما تلصقش ماتكونش رقيقة وماتكونش خشينة وتشكليهم دوائر بالكاس وتخليهم يخمر يعني يريحو ثاني في مكان بارد انا نخليهم في الكوزينة منحطهمش في بلاصة سخونة وبعد ذلك تسخني الزيت وتقليهم بلا ماتكبي فوقهم الزيت يتنفخ والحشو كيما تحبي ديريلهم لكرام باتيسيار وذري فوقهم السكر الارطب رهم روعة وبالاخص مع قهوة العشية جربيهم وماتخافيش اعطيوني رايكم فيهم كي تجربوهم ردولي بالخبر صراحة هاذي الوصفة معتامدتها من مدة ويجيو بنان حتى في القليان نتاعهم ميتعبوش متبقاوش تكبي في الزيت يتنفخو ثمثم ملاح لضياف الغفلة ملاحظة خاصة بي : متنساوش الملح بالنسبة للعجين خليتو ربع ساعة ريح وكي طبعتهم خليتهم نصف ساعة خمرو فيها وطبعا كي تحلو لعجينة رشو قبل بالفرينة بالنسبة لزيت انا كي منكثرش الزيت نبقى نكب فوق الحبة حتان تتنفخ واذا كانت كمية الزيت كبيرة مع نحط الحبة تتنفخ وحدها اما كمية الفرينة لي درتها انا تقريبا حوالي رطل فرينة وضفت المقادير الباقية منقستش منها والو خليت المقادير عادي دارتلي كمية كبيرة ولي تحب كمية قليلة تكيل كيما قالت صاحبة الوصفة بول نتاع شربة وكي كيلت بول شربة لي عندي قدش يهز من فرينة بباط ياؤورت فارغ لقيتهم 5 باطات ياؤورت فارغين نتمنى اني نكون افدتكم رابط الوصفة https://www.djelfa.info/vb/showthread.php?t=1761179 تطبيق ام ماجد : تطبيق لاول مرة ام سراج وملاك: تطبيق lyzzabel تطبيق ام وابنة تطبيق fadila34 تطبيق سرور2 تطبيق الرجاء الاماني المجد تطبيق um alaa تطبيق oumoujou تطبيق اسمهان 79 تطبيق دائمة الحمد تطبيق OUM SOUHAIB تطبيق ام هدول تطبيق RIMA.87 لبنات لي نسيتها تسمحلي وتبعثلي عبر الخاص الصور نزيد نحطها ولي مطبقوهمش نقلهم واش تستناو جربوهم اكيد يعجبوكم ولي حابة تحط الصور هنا ماشي مشكل نخليكم في امان الله