السلام عليكم و رحمة الله
رمضان كريم ينعاد علينا و عليكم
اليوم حبيت نشارككم ببعض اطباقي المتواضعة اللي نطيبها في هذا الشهر الكريم و في الايام العادية و الفكرة خطرت ببالي بطلب من الاخت الكريمة لوصفة طبق حطيتو في الكوزينة في موضوع واش طيبتي اليوم الجزء 135
تحت شعار ذوقو طعامي و ذوقوني ملح طعامكم
اقتباس:
المشاركة الأصلية كتبت بواسطة *توبــــة*
وش تسخفني ماكلتك يا الحبيبة
يهبلو يهبلو ربي يبارك ولونهم ياكد بلي بناااان وخفاااااااااااف
يعطيك الصحة
ويلا تقدري قوليلي كيفاش تعملو طاجين الشواء سشفتك حطيتيه
ف الكوزينة....... مزالو في قلبي
|
و نفتح الموضوع لكل الاخوات الكريمات اللي يحبو الطبخ و تعلم الجديد و الاستفادة من طبخ الاخرين و مد يد المساعدة بكل روح رياضية و نتعلمو من بعضنا البعض و نفيد و نستفيد
انا تعلمت اصول الطبخ التقليدي على يد الوالدة ربي يحفظهالي و لانني كنت ادرس و كل وقتي في الجامعة علمتني الاساسيات و الضروريات فقط يعني مثلا المسمنات و الغرايف و الفطير و كيفية اعداد مرق ابيض او مرق احمر و مادخلتش المطبخ بزاف و تزوجت و لما صرت مسؤولة عن عائلة و اولاد حبيت نتعلم كل جديد في الطبخ و نتعلم فنون التقديم و الطبخ العصري
البداية كانت مع كتب الطبخ التي تملا الاسواق الى ان تعرفت على منتدى الجلفة و افتخر اني عضوة بهذا المنتدى العظيم بكل اقسامه و اعضائه و تعلمت اشياء كثيرة على يد مبدعات قسم الطبخ و مازالني نتعلم لليوم من المبدعات و حتى من العضوات المبتدئات امثالي احيانا نجد في النهر ما لا نجد في البحر
تكلمت بزاف مختصر الموضوع نحطو اطباقنا و طبخاتنا و هكذا نذوقوا ملح بعضنا و تصير عشرة و ملح كيما يقولو المصريين اذا امكن بالصور و الا فبالكتابة و هكذا نتبادلو الافكار و نتبادلو الوصفات و النصائح و اللي تحب وصفة تطلبها و اللي تحب نصيحة تلقاها و هكذا نشوفو اطباق متنوعة و تقديم مختلف و نهزو افكار من بعضنا
واش رايكم في الموضوع
نتمنى مايكونش عندو اي تشابه مع موضوع واش طيبتي اليوم لانو هذاك موضوع دائم لكل الفصول و الشهور و جامي نستغناو عن موضوع الكوزينة المتجدد اللي انا وحدة استفدت بزاف من مشاركتي فيه
و الهدف الاول و الاخير منه هو اني نشارككم طيابي و اطباقي و نذوقكم ملح طعامي و نذوق ماكلتكم و ملحكم و نتعرف على اطبقانا التقليدية لمختلف ولايات الوطن الحبيبب