السلام عليكم
واخيرا كيما قلتلكم ... اليوم نحطلكم وصفة البرك التركية
من أروع مايكون
الوصفة سهلة لكن تشد شوية وقت برك
مقادير العجينة
500 غرام فرينة
125 مللتر ماء بارد
بيضة
2 ملاعق كبيرة زيت
ملعقة كبيرة حليب بودرة
ملعقة كبيرة سكر
ملعقة صغيرة ملح
مقادير عجينة الدهن
100 غرام سمن او زبدة (أنا استعملت السمن)
100 غرام فرينة
بيضة
طريقة التحضير
في وعاء نمزج السكر + ملح + زيت + ماء
ونخلطو حتى يذوب السكر ثم نضيف البيضة ونحرك
في وعاء آخر نخلط الفرينة والحليب بودرة ونضيفلهم الخليط السابق
ونعجنوها مليح مليح مليح
ونخليوها ترتاح في الثلاجة لمدة 15 دقيقة
في هذيك المدة نوجدو عجينة الدهن
نخلطو السمن + بيض.. ونضيفو الفرينة على دفعتين مع التحريك
نخرجو العجينة نتاعنا ونخدموها على شكل بودان طويل ونقطعوها الى قطع
1 قطعة كبيرة حوالي 120 غرام
والقطع الاخرى تكون متساوية حوالي 75 غرام
نفوتو القطع الصغيرة في الفرينة ماعدا القطعة الكبيرة
نضع جميع القطع في طبق مرشوش بالفرينة
ونغطيها بقطعة قماش تكون مبللة
نحل القطع الصغيرة بسمك 3 ملمتر
والقطعة الكبيرة بسمك 1 ملمتر
ندهن مزيج السمن والفرينة في وسط القطعة الكبيرة ونحط فوقها قطعة صغيرة
نزيد ندهن فوقها السمن ونحط فوقها قطعة صغيرة
وهكا حتى نكملو كامل القطع... نخليو فقط قطعة صغيرة في الاخير
نلف القطعة الكبيرة على القطع الصغيرة وندير بين اللفات السمن
ونغلق مليح بالقطعة الصغيرة المتبقية
نرشها بالفرينة ونخليها ترتاح في الثلاجة لمدة 24 ساعة
نحل العجينة بسمك 2 ملمتر
مين ندير الحشو نتاعي نغطي النصف المتبقي من العجينة بقطعة القماش المبللة
ننحيو الفرينة لي فوق العجينة
انا استعملت في الحشو : لحم مرحي + جبنة + زيتون مقطع + توابل.. ديرو الحشو كيما تحبو
وتخليو بين كل وحدة 3 سم
تغطيوها بالعجينة مع الضغط على الأطراف
وتقصو القطع نتاعكم وتحطوها في سينية مرشوشة بالفرينة
تسخنو الزيت مليح وتقليو قطع البرك
مين يسخن الزيت نقصو شوية للنار باش تطيب العجينة
وهذي البرك في صحن التقديم
شكرا حبيباتي على التشجيع
واليوم قلت نحط الصور باسمي علاخاطر سرقولي احذى الوصفات
ههههه
اليوم قلت ندير القلب وندير اسمي هكا مايغيضنيش التعب نتاعي
دعواتكم حبيباتي
سلااااااااام