[إلهام07]

الوصفة 15

كل وحدة تحط عنوان سوفلي من مطبخي ، لازانيا من مطبخي ...... قلت ياسيدي أنا ثاني عندي مطبخ ماهمش خير مني والله نندير موضوع ونحط وصفة كذا من مطبخي ههههههه
جيت وجبتلكم وصفة حساء البسباس اللذيذ ، حتى اللي مايحبش البويون يعجبو في الذوق وأسرتي أولهم ، كي نديرو يخلاص ما يبقى منو والو ,
استغلو الفرصة وجربوه راهو البسباس رخيص في هاذي الفترة ( عندنا يدير حوالي 30دج للكغ ) ، قلت نحطلكم الوصفة باش تستفادو بيها .
قبل ما نبدا ، هاذي وصفتي و طريقتي وليست منقولة لا من منتديات ولا من برامج أحم أحم

المقادير :
* 5 حبات بسباس
* 3-4 حبات جزر
* حبة بصل
* 2-3 فصوص ثوم
* 2 حبات بطاطا متوسطين
* شوية معدنوس ( اختياري )
* 1/2 راس كرفس ( ماشي اختياري لازم و إذا ماعندكش روحي لجارتك سلفي عليها شوية )
* توابل : ملح + فلفل أسود + حبة حلاوة ( حبة حلاوة ثاني لازمة في هذا الحساء تتلاءم مع طعم البسباس و الكرفس )
* 3 ملاعق زيت
* 1 قطعة ماجي أو دجاج اللي يحب ( هو بدون دجاج ويجي بنين و ما ذكرتش اللحم لأن البسباس يتلاءم أكثر مع الدجاج )
* حوالي كاس حليب أو كريم فراش ( أنا استعملت حليب عادي )

الطريقة :
1- نقلي في الزيت الثوم والبصل مقطعين حوالي 5د
2- نضيف باقي الخضر مقطعة و التوابل و نقلي حوالي 5د

3- نضيف كمية من الماء دون أن تتغطى الخضر تماما ، مثل الصورة ، ما تكثروش الماء باش جي بنينة :

4- بعد ما تغلي نغلق الكوكوط و نخليها طيب حوالي 30د
5- نرحيها في الروبو مليح و نرجعها للكوكوط على نار متوسطة
6- الخليط رايح يجي ثقيل ، نزيدو حبة الماجي ( أن نفضل الماجي على الجومبو ) و نحرك حتى تذوب
7- نضيف الحليب أو الكريم فريش قليلا قليلا و نحرك حتى نتحصل على القوام المطلوب
8- نخليها تغلي 5 د و نطفي عليها
9- نقدمها مع رشة زيت زيتون راهو يضيف بنة روعة للحساء


قدمت الحساء مع سلطة سلق و خبيزة السلق و خبز توتة الهشوش :






أتمنى أنكم جربوها راهي بنيييييييييييييينة

قبلاتي