[faizarbh]

وصفات يوم الاربعاء : 2013/01/23 .../2013/01/16


**سلطة باغصان السلق**
أغصان السلق ذات حجم كبير نقصوهم و نغسلوهم و نفوروهم 20د ثم نديرهم في بلا و كي يبردو نرابو عليهم حبة طماطم و 2 فصوص ثوم مرابيين و 2 مغارف أكل لبن و ملح و فلفل و شوية خل و شوية زيت و ممكن نعوض الخل و الزيت بعصير الليمون و زيت الزيتون و نلطهم مليح و ديرهم يباتو فالثلاجة ثم غدوة من داك نقدمه في في صح و نزينهم بوريقات خس و زيتون




**الدوبارة البسكرية **

2 كيسان فول يابس و منفخ
2 كيسان حمص منفخ
يعني طايبين
6 مغارف اكل زيت
قرن حار اخضر
ملح و فلفل و فلفل عكري و شوية كمون و مغرف اكل طماطم مصبرة و حبة طماطم رابي
في قدر ندير الفول و الحمص و الزيت و الملح و الفلفل الحار و الكمون و نقلوهم 20د بعدها نصبو الماء سخون .
من جهة ندير 2 فصوص ثوم و بصل رابي و طماطم مرابية و نقلوهم 10د
ثم نصفو الفول و الحمص و نضيف المرق تاعهم للثوم و البصل اللي قليناهم 10د و نخليهم شوية يطيبو و نفرغهم على الفول و الحمص عند التقديم .


** قراتان فرنسي **

نقلي 2 بصل مع فلفل و مغرف زبدة مدة 10د بعدها نضيف 300غ لحم مفروم و نقلي 5د ثم نضيف 2 حبات بطاطا مرابية بعدها نطفي .
كيلو شفلور نقطوه زهرات و نفوروه مع قطع ليمون وكي يطيب نرحوه بالفرشيطة و هو سخون + ملح و معدنوس و فلفل و نشكلوه حرابيش صغار و نخلوهم 20د يشدو رواحهم.و بعدها نرمدهم فالفرينة ثم فالبيض ثم فالخبز يابس ثم نقلوهم
في ليان ندير 3 بيض مضربين مع ملح و فلفل و علبة بتي سويس و نضرب و نغطس فيهم حرابيش الشفلور اللي قليناهم و نزيد نرمدهم في جبن شيدار مبشور
ندهن مول الغراتان بالزبدة ثم ندير طبقة اللحم و البطاطا ثم طبقة حرابيش الشفلور ثم ندير المعدنوس مقطع من فوق و تحبي اديري من فوق صوص طماطم او شوية بيشاميل واش تفضلي اختياري ثم الى الفرن.



** سلطة شتوية بالقرنون **
كيلو قرنون .
عصير ليمون و مغرف ماكلة خل ابيض
مغرف فرينة و مغرف صغيرة ملح
3ملاعق اكل عدس مغلي
4ملاعق اكل ارز مفور
2ملاعق اكل مايوناز
مغرف اكل معدنوس مقطع رقيق
وريقات سلطة صغار اللي يجو فاللب
حبات زيتون اسود و وريقات نعناع
حبة طماطم مكعبات
بعدما انقو القرنون نديروه في كاسرنة مع لتر ماء و خل و فرينة و ملح و نغليه 25د ثم نصفيه و نخليه يبرد
في ليان ندير العدس و الارز و نخلط +2مغارف اكل مايونيز و نخلط + المعدنوس و نعمر بيه القرنون
في صحن التقديم نفرش الخس و نحط عليه القرنون و ندير فوق كل قرنونة ورقة نعناع بالوقاف و نثبتها بحبة زيتون و نحط الطماطم على الخس باش تعطي لون باهي و ندير صوص الفينيقرات.
صوص الفينيقرات فيها 6 مغارف اكل زيت +ملح+3 مغارف اكل خل ابيض و حبات عدس يابس و اوراق زعتر جاف و نخلط.







** خبز الدار **
4 كؤوس فرينة
كاس سميمدة اي سميد رطب
ملعقة قهوة ملح و فنجال اتاي زيت و ملعقة و نص خميرة خبز و 2 ملاعق زعتر و شوية ما دافئ
نعجن الكل و نخلها ترتاح 30د و نكسرها و نصنع 3 خبيزات و نخليها ترتاح 20د
ثم نخبزها على سميد خشين بسمك 1 سم و نرمدها فيه مليح و نخمرها جيدا و نطيبها فيالفرن او طاجين.




**مقبلة فرنسية **
الحشو:200غ لحم مرحي + فنجال كبير زيتون اسود مقطع + قرصة ملح و فلفل و 3 مغارف زيت و حبة بصل و حبة طماطم مقطعة مكعبات.
نقلو البصل مع التوابل و الزيت و الطماطم و اللحم و خليوه يبرد.
العجينة:3 كؤوس فرينة + حبة بيض + مغرف قهوة ملح + نص فنجال آتاي زيت +2 مغارف كبار سميمدة رطبة + مغرف قهوة موتارد+مغرف ماكلة خميرة خبز + ماء دافئ و نلمهم و نخلي العجينة ترتاح 25د و نكرسها و نعملها بولات قد حبة بيض و نحلوهم و نعمروهم بالحشو على شكل خبيزات و نخلوهم يرتاحو فالصينية ثم بعد ما يخمروا نديرلهم صفار البيض + موتارد من فوق و نديرلهم الجلجلان و نطيبهم.



** طاجين شفلور مغربي **
في طاجين ندير اطراف دجاج +بصلة مرابية + ثوم مدقوق + مغرف كبيرة زبدة + ملح و فلفل و قرفة و زعفران و كاس حمص و نقلي 20د على نار متوسطة ثم نضيف 3 ملاعق عصير ليمون + 2حبات لفت مقطعين طراف ثم نضيف ملعقة عسل و نقلي 5د ثم نمرق ب2 كؤوس ماء سخون .
من جهة اخرى نفور زهور الشفلور + ملح و فلفل و قشور ليمون مقطعة ثم نخلوه يبرد
في غراف ندير 2 صفار بيض و نضربهم مليح + فنجال صغير حليب و نضرب + 2مغارف اكل مايزينة و ملعقة اكل خبز يابس و نغطس فيه زهرات الشفلور و نقليه في زيت قليل .
ثم في صحون التقديم ندير الزهور مع المرق و الدجاج و يمكن نعوضو اللفت بالجلبانة.






** حلوة معسلة **
4 صفار بيض / 250 غ زبدة بوماد / نص كاس سكر قلاص / 2 مغارف اكل لحظة / 3مغارف اكل كاكاو / نص باكي خميرة كيميائية / فرينة حسب الطلب
الحشو : غرس مفور مع قطرات ماء زهر / عسل .
في جفنة ندير البيض + الزبدة و نخدمهم مليح + نص كاس سكر قلاص و نخدم + اللحظة و كاكاو و نزيد نخدمهم و الخميرة و نواصل بالفرينة و نغطيها ترتاح 10د ثم نحلها بسمك 2ملم و نقطعها دائريةثم نحشيها ب بولة صغيرة تاع غرس و نغلق عليها و نلفها مليح و نديرها في صينية الفرن و ندير فوقها عملية x بالمقص كيما نزينو لامونة و نطيبها و مباشرة كي نخرجها من الفرن نعسلها و نزينها بالبيستاش مدشش مكان فتحة x .






** شربات الحلويات **
كيلو سكر نذوبوه 5د كي يروح ينحرق نزيدلو لتر و ربع ماء و نتركه 15د على النار ثم نكسر قطعة شب في مهراس و نأخذ ملعقة قهوة شب نديرها فيه و فنجال ماء زهر .






** مقروط بالغرس في الفرن **
كيلو سميد متوسط / 4ملاعق اكل حليب بودرة /4 ملاعق اكل فرينة / 4ملاعق اكل مايزينة / 4 ملاعق سمن بوماد / 200غ زبدة ذايبة / نص باكي خميرة كيميائية و كمية ماء زهر
التحضير: ندير السميد + الحليب + الفرينة + المايزينة + السمن و نخلط ثم الخميرة و نخلط ثم الزبدة تدريجيا و نلمها بماء الزهر و نتركها تبات و الا وجدناها ناشفة نرشها بماء الزهر بالاصابع و نشكل حربوش و نضع الغرس داخلو و نقطع مقروطات ثم نطيبوه في الفرن 30د ثم نسقيه بالعسل فالسنيوة و تكون ساخنة و عندما يبرد المقروط نديروه في كسكاس و نفرغ عليه العسل و نركه يقطر و نزين بحلوة فضية