[~ حراير ~]

المشاركة الأصلية كتبت بواسطة ~~ أغيلاس ~~

السلام عليكم و رحمة و رحمة الله و بركاته .


و عليكم السلام و رحمة الله تعالى و بركاته

المعلمة بعدما مرت على كل التلاميذ أخبرت كل تلميذ بنقطة ضعفه أما أختي فقالت لها : ليس لي ما أقوله لك واصلي كما أنت، و قالت للتلاميذ أنها هي الوحيدة اللي فرحتها،

ماشاء الله لا قوة الا بالله اخي أغيلاس انت انسان تبان ملتزم و ثابت ارجوك دايما قول ماشاء الله لا قوة لا بالله او يا سيدي قول كيما رئيسنا تبارك الله اولا نطبقو تعاليم ديننا الحنيف و ثاني كيما نقولو في بسكرة عين العزيز تحكم أكثر و انت اكيد تحب اختك ربي يحفظها .... و ربي يرزقك بما تتمنى آمين

أختي جاءت فرحانة كثيرا و قالت لي راني خايفة نهبط في الفصل الثاني و يديولي المرتبة الأولى و قالت : إن شاء الله زملائي يبقاو كيما راهم ، يعني الآن راهي تفكر كيف تحافظ على مرتبتها في القسم،،،،،،،،،،،،،،، قلتلها : لا، زملاءك إن شاء الله ربي يوفقهم و يجتهدوا أكثر، أما أنت لازم تتحصلي على معدل أفضل من معدل الفصل الأول و لازم تتفوقي أكثر،،،،،،،،،،،، عجبها كلامي بزاف و دايما تقولي يعجبني الحال كيما تقدملي موعظة ( ههه نصيحة ) و الأسبوع الماضي دايما تجي للمنزل فرحانة لأن المعلمة تقدملهم بزاف مواعظ ( ههه نصائح ) .

بالمناسبة راهي قرات بعض المشاركات و ابنتك و ابنة الأمنيات راهم داخلين في زمرة المنافسين لها، قالت في الفصل الثاني ندي خير منهم بين زوج .

قلها ياله خلي نرفعولهم الهمة و لعزيمة ... عموما فعلا أختك محظوظة أنها عندها اخ مثلك في القمة ماشاء الله
و يلزم عليها تحس بمجهودك و تكون شاكرة لك و لله الي عطاها أخ مثلك يعني هاد النعمة مش كامل عنددهم كيفها
ربي يحفظكم من كل سوء و بلاء

بالنسبة لكل المواد هي تتبع مع المعلمة جيدا و لما لا تفهم و لو حاجة صغيرة تجي للدار مباشرة تقولي مفهمتش، الرياضيات لما تقدملهم المعلمة التمارين نحلوهم بين زوج، و قبل الفروض و الاختبار نجبد الفروض و الاختبارات اللي خرجتهم من منتديات الجلفة و طبعتهم الصيف اللي فات، نخيرلها التمارين اللي درسوهم، نعطيها نماذج تحلهم و البقية تحلهم شفهيا بمعنى تعطيني طريقة الحل، في الغالب تمارين الفروض و الاختبارات يكونو متشابهين،،،،،،،،،،،،،،،، و اختبارهم لهذا الفصل صراحة جاني ساهل بزاف بزاف لأننا حلينا تمارين أصعب منو بكثير لكن للأسف تقريبا كل زملائها مخدموش ( هردوها ) جابت تسعة ونصف و راحتلها نصف نقطة في العمليات الحسابية بسبب جدول الضرب،،،،،،،،،، هي الاختبار جاها ساهل و أنا زعفت لأنه ساهل بزاف لكن زملاءها الظاهر أنهم ميراجعوش فالدار يوميا،،،،،،، و الله أعلم .

• هي نفس طريقتي تقريبا الحمد لله اني عرفت روحي نمشي في الطريق الصحيح
• انا نعرف بنتي تحب التشجيع كثير و رفع المعنويات على هك في فترة الإمتحانات طبعتلها بعض امتحانات سنة الخامسة في الرياضيات و اللغة مع بعض التعديلات البسيطة و باقي امتحانات سنة رابعة كامل كتبت عليهم سنة خامسة و هي اريج من عادتها انها تنسى كتابة اسمها على الورقة يعني قليل ما تقرأ ما كتب على فوق الورقة و لما نبهتها في آخر المراجعة انها حلت امتحانات الخامسة راح طير بالفرحة قاتلي امتحانات الخامسة فهمتهم و حليتهم مالي امتحانات الرابعة راح نقرقشهم تقرقيش "يعني ناكلهم ماكلة" و الحمد لله كما قتلك من قبل على نتايجها في اللغة و الرياضيات

بالنسبة للغة العربية كل ما يقراو درس تجي للدار تطلب مني نعطيلها نماذج تعربهم، عندها كتاب خارجي في القواعد و الإعراب و هاذ الكتاب حكايتو حكاية ( هههه ) الصيف الماضي أخذتها معي للمعرض الدولي للكتاب كجائزة تشجيعية لتفوقها في السنة الثالثة ،
في المعرض لما ندخلو وين كاين الكتب المدرسية كل كتاب تشوفو تقولي نشريه و انا طبعا أرفض لانني نحب نشري الكتاب اللي تستعملو مش تخبيه، و صراحة أغلب الكتب معجبونيش في كل المواد، بالنسبة للفرنسية كنت شريتلها من قبل زوج كتب و زيد اللي طلعتهم من منتديات الجلفة، كتب الرياضيات تصفحتها و لقيت تمارينها سهلة جدا و تمارين الكتاب المدرسي أفضل منها بكثير،،،،،،،، بقات اللغة و بعد إصرارها شريتلها كتاب ( عجبني ) تع القواعد و التصريف فيه الأمثلة ثم القاعدة ثم مجموعة من التمارين و الإعراب،،،،،،،،،،،،، هذا الكتاب سلكني ( لأنها لما ما تفهمش و لو حاجة صغيرة تبدا تشكي و تتأسف ) كل ما يقراو درس تجي لهذاك الكتاب و تقرى منو وحدها و انا نزيد نفهمها وش مفهمتش .

باقي المواد انا نقلها احفظي وحدك، تعلمي تعتمدي على نفسك، و عليه تحفظ وحدها و لما تكمل تجي تعرض عليا جميع الخلاصات .

و لما يكون عندنا الوقت يوميا نقراو فرنسية، نحفظو كل أسبوع نص أو نصين طبعا مع فهم أغلب مفرداته و تعابيره و نحلو مرة على مرة تمارين من الكتب الخارجية بصفة يومية،،،،،،،، و الأسبوع الماضي بديتها إملاء الفرنسية، دايما قبل ما نقراو فرنسية نملي عليها على الأقل جملتين من نصوص كتاب القراءة، نعطيلها تشوفهم مليح ثم نحيلها لكتاب و نملي عليها صوت بصوت و لما تغلط نصلحلها، لكن بالتكرار راح تتعود .

كما قتلك رانا نمشو كيفكيف
أما مساء يوم الخميس ( ليلة الجمعة ) فهذي دايما مخصصة لحفظ القرآن لأنها تدرس في مدرسة قرآنية،،،،،،، يقراو مرة في الاسبوع و تحفظ على الأقل حوالي الصفحة كل اسبوع لتعرضه على معلمة المعهد يوم الجمعة .

هنا عندي وقفة راكم تربحو في الأجر ماشاء الله باذن الله راح ندير برنامج معاكم ليا انا الكبيرة و للصغار شكرا لك على التنبيه


هذا عن الدراسة خلال الفصل أما برنامج العطلة فسيكون حفظ جداول الضرب، حفظ القرآن الكريم، مواصلة حفظ نصوص الفرنسية مع حل التمارين .

في الرياضيات قدمتلهم صفحة تمارين سوف نخصص لها وقت،
معملة الفرنسية قدمت لهم صفحة تمارين أيضاسوف يكون لها وقت إن شاء الله،

ماجابو والو من المدرسة لكني حملت بعض الواجبات من هنا اذا كان ممكن تقولي على صفحات واجباتهم نعندوكم

أما حفظ القرآن فهذه أفضل فرصة للحفظ لأنه خلال الفصول الدراسية مكانش وقت كبير، ممكن راح تحفظ كل يوم نصف صفحة أو أقل، أو ممكن يومين بيومين،،،،،،،، المهم يكون هناك تحصيل،،،،،،،،،،، بهذه الوتيرة راح تحفظ القرآن كاملا قبل 17 سنة إن شاء الله،،،،،،،،،،،،، مشي شرط تحفظ بزاف المهم تحفظ و لو ثلاث آيات في يومين المهم االمداومة،،،،،،،،،،،،،،،،،،،،،،،،

أختي راهي خايفة متجيش الأولى فالمدرسة القرآنية لأن أغلب زميلاتها متفوقات دراسيا، درتلها موعظة و قلتها تحفظي وش قدرتي المهم ما تتكاسليش و راح تتفوقي عليهم كلهم،،،،،،،،،،،،،،،، هيا تحب اللي يشجعها و أكيد قنعتها :d .

جدول الضرب راح يكون له وقت إن شاء الله .

و أكيد الفرنسية راح نكملو النصوص الآن رانا واصلين للنص رقم 14، لما كنا نحفظو لما وصلنا للنص التاسع عاودت درتلها مراجعة لكل النصوص ( تسعة ) و راجعتهم في يومين، و هاذ الاسبوع و اللي قبلو راجعنا الأربع نصوص مليح،،،،،،،، ممكن اليومين أو الثلاثة أيام للعطلة راح تراجع كل النصوص اللي حفظتهم للتثبيت، و بعدها ندخلو نصوص جديدة، المهم على الأقل راح تحفظ هاذ العطلة من ثلاثة نصوص إلى خمسة نصوص جديدة على حسب الوقت،،،،،،،،،،،،،،،،،، و راح تحل تمارين من الكتب الخارجية،،،،،،،،،، مع الإملاء قبل بداية كل حصة طبعا،،،،،،،،،،،،،


من فضلك خويا اغيلاس تقولي راك تقصد نصوص كتاب السنة الرابعة و ان ماكانش فيها ازعاج تعطيني العناوين الي حفظتهم بالنسبة للقصص الي قتلي عليهم ما لقيتهمش لكني لقيت قصص بلغة مزدوج شريتلها بعضهم و عجبوها كثير ما حبيتش نكثرلها باش ما نحملهاش فوق طاقتها
و ان شاء الله راح نبدأ بالضبط مثل ما قاتلي اختي المعلمة الفاضلة رجاء راح نبدالها بالشوية يعني جمل متداولة و بعدين نروح للنصوص الي راح تخبرني عليهم

إن شاء الله هذا هو البرنامج،،،،،،،،،،،،،، و أكيد مش راح يكون مكتظ،،،،،،،، ممكن ساعة و نصف أو ساعتين إلى ثلاث ساعات في اليوم و الباقي لعب، و بعض الايام راح تكون بيضاء لأسباب متعددة كتوافد الضيوف خاصة إن جلبوا معهم أطفالهم،،،،،،،،،،

و لا تنسَيْ كما قال الأستاذ عبد الناصر؛ البرنامج يجب أن يكون على حسب قدرات الطفل، يعني لا يجب أن يُحمّل الطفل ما لا يُطيق لأن القدرات و المهارات متفاوتة،،،،،،،،،

بالنسبة للهدية تعها راح تكون جولة إلى حديقة الألعاب و التسلية خلال هذه الإجازة،،،،،،،،،،،،،،،،،،

برنامج رائع بالتوفيق ان شاء الله و رحلة ممتعة
والله اني من قلبي و من نيتي نتكلم معاك ... يا ريت كان في مقدوري كنت عزمتكم كل من نعرفو في هاد الصفحة لزيارة مدينة بسكرة كنت نديكم تزورو مسجد سيدي عقبة و نا خذكم لتسبحو الله و نتوما تشوفو في جبال القنطرة و تشوفو حياة اجدادنا و مساكنهم في غوفي و تشربو مياه صافية من جمورة ... و لكن وش راح نقول ان شاء الله نتلقاوي في جنة و نلقاو عند ربي ماهو أفضل من هذا ... ربي يدوم العشرة الطيبة و الحمد لله الي لاقاني بناس مجتهدين و نافعين مثلكم

أعتذر إن كنت قد ثرثرت لكني ما قصدت من هذا إلا أن يستفيد كل شخص من تجربة الآخر،،،،،،،،،،،

ارجوك لا تعتذر انا كنت نتمنى لو زدت تكلمت أكثر من هك
بارك الله فيك افدتني و ذكرتني بعدة امور ربي يسهلك الصعاب و يسترك دنيا و آخرة و ربي يكون في عونك آمين