[~ حراير ~]

السلام عليكم و رحمة الله تعالى و بركاته
يصبحك بالخير و الراحة و الهناء معلمي المحترم
بارك الله فيك على النصيحة و راني كبرتها و درتها في إطار جميل و طبعتها و راني راح انغلفها و نعلقها
والله انها نصيحة عزيزة و غالية و فوق العين و الراس خاصة و أنها جات من معلمي و معلمه ربي يحفظكم بما يحفظ به عباده الصالحين المخلصين آمين

الشيخ عبد الناصر عندك الحق في كل كلمة قلتها و أنا طبعا موافقاتك و نستاهل تقولي أكثر من هكداك و نستاهل الضرب على راسي .... و لكن يا لوكان جيت أنا المذنبة راهو السنة الرابعة مع معلمته

كان عندهم واجبات بزاف و حفاظة أكثر حتى أني ما راجعتلوش للإمتحان بالدراع ما أقنعتو أنه يراجع خميس و جمعة و سبت و رغم هاد قعد مصر انه يعاود يراجع العلمية لأنه غلط فيها الويكاند الي فات .... المهم حتى أني من عادتي نعطيهم وقت للراحة ما بين المراجعة لكنه ما خلانيش و قعد يصر أنه يكمل واجباتو .... كما أنه المعلمة ربي يهديها كثرتلهم الواجبات و ألزمتهم بحفظ سورة الليل كاملة مع شرحها و يستعرضوها اليوم " بحجة أنها انسات ماقلتلهمش نهار الأحد" يعني نستحمد لربي أنه كان حافظها من قبل ما غير راجعها

يا الشيخ أنا مش نعطي لنفسي مبررات و راني مستعرفة بخطاي و راني نقول كون ما طاوعتوش و ألزمته بالراحة لكن والله هاداك هو الوقت ما كملنا واجبات الرياضيات في المضاعفات و الضرب في 10 و 100 و 1000 "بشرحهم" و تمرينات اللغة و امتحان منزلي في الفرنسية و زاد عليها كتب تعبير على وصف الجزائر "والله يا الشيخ جا ماشاء الله حبيت غير يقراهولكم" خاصة و أنه استعان بمجلة و انقل منها بعض المفردات ... و زاد لخص نص رحلة عصفورين "يتكلم عن الجزاير" لأنها قاتلهم ممكن نطلبه منكم حضروه و الشي الي عجبني أنه امس الصباح راح لمعلم و هو جارنا يدرس في مدرستو و دَبَر عليه أنه يكتبه على شكل نقاط لأنه كل النص مهم لذكره .... و مع كل هدا راجعنا العلمية تقريبا 6 دروس

....... على هك يا الشيخ راني طبعت الدرر انتاعك و رايحة نلصقهالو فوق المكتب باش يرحم روحو و يرحمنا معاه
رغم أنه كاين حاجة في نفسي تقولي أنه هو و معلمته عندهم الحق لازم مداومة المراجعة ليس من أجل الإمتحانات و لكن لأنه معروف أن السنة الرابعة معمرة بزاف و لأنها الأساس للخامسة حتى أن جارتي تقولي الخامسة هي مجرد مراجعة للرابعة و الي ما درسش في الرابعة يتعب في الخامسة

علابالي بلي كثرت بالهدرة ....... تقدر تقول راني انفرغ في قلبي

مالي هيا تبقاو عى خير