قبل قبل وينهم ناس امجدل - الشاعر مداد اسماعيل
وينهم امجدل الشاعر اسماعيل
قبل قبل وينهم ناس امجدل**حاسي بحبح قا مـــرة ونخليــــــــه
أهل ناس املاح طالبهم نرحل** لابد ياتي نهار أنــولي ليـــــــــه
وانا بري بالذهب ما يتبدل**ارجال الهمة في الشدة وابكـاو عليــــه
سيدي نايل في الصحرا ولا في التل**مول الجودة والكرم ربي عاطيه
سيدي عيسى جارت عين الحجل**وسارة حد الصحاري وامليــــه
سيدي عامر تامسة حد يكمل** مناعة ديوانهم النيــة فيـــــــــــه
وراحةفي بوسعادةوالهامل** جبل امساعد دايرين جبال بيـــــــــــه
عين الملح اسليم ضاري نتجول** لميلح دار الشيوخ حذاه لهيــــــــه
عين معبد دونها قداش اجبل** كافك ياحواص قلبي يهنا فيــــــــه
الجلفة حتى المسعد عين البل** وشارف بطريق وحدة تدي ليـــــــه
يا سيدي مخلوف قلبي متهول**لغواط المعلوم غرداية منهيـــــــــــه
البيت الحمرة والخواتس والحنبل** حتى النعجة كل مرسم ترعى فيه
مازال في حالهم ذوك الرحل**ولي عاشق في الجمل راه مربيــــــــــه
مازال عداتهم في الناس الكل** مازال صفاتهم ياقاصد ليــــــــــــــه
زين بلادي نايلي راه يهبل**الحرمة والحشمة والعقل مواتيـــــــــــه
والفرسان بالخيل عربي لول** لمصيل مرفــــــــــوع راس لمليـــــــــه
ياسامع بردهم راه يزلزل** ياشايف مشوارهم تتعجـــــــــب فيــــــه
ارجال المعاد على حق اتعول** مافيهم مظلوم ولا ظالــــــم ليـــــــــه
أنا فرجاوي نايلي لأم امجدل** مفروض اعليه المكتـــــــوب انعديـــه
بن مداد ابخاطر هاك تخيل** ناس النية حـــالهم ربـــــــي يبغيــــــه
ماني نكتب على الشمايت وأهل الذل** ماني نكتب على الجاني والسفيه
راني نكتب على الرجال اللي تعدل** أهل النيف أللي نيف تموت عليـه
بقلم الشاعر المجدلي : مداد اسماعيل
مرت القصيدة (أولاد نايل) بالتلفزيون الجزائري ،